Дәріханалар неге әлеуметтік маңызы бар дәрілерді сатып алудан бас тартып отыр?

Egemen.KZ парақшасындағы деректерге сәйкес, Qazaq24.com ақпарат таратты..

Елордада өткен Жобалық кеңсенің кезекті отырысында жаңа Салық кодексінің нормаларын енгізу аясында денсаулық сақтау саласындағы өзекті түйткілдер талқыланды. Күн тәртібіне дәрі-дәрмек импортына кедергі келтіріп отырған құқықтық тосқауылдар мен өмірлік маңызы бар препараттарға қосылған құн салығын есептеу мәселелері шықты, деп хабарлайды Egemen.kz.

Фото: atameken.kz

Кедендік талаптардағы кедергілер

Отырыста ең алдымен дәрілік заттарды елге әкелу кезіндегі жүйелі қиындықтар сөз болды. «Атамекен» ұлттық кәсіпкерлер палатасы төрағасының орынбасары Тимур Жаркенов бизнестің бүгінде заңсыз тап болғанын атап өтті. Оның айтуынша, кеден органдары міндетті әлеуметтік медициналық сақтандыру мен тегін медициналық көмектің кепілдік берілген көлемі аясында жеткізілетін дәрілерді қоса алғанда, препараттардың нысаналы мақсатын растауды талап ете бастаған.

«Мұндай тәжірибе қолданыстағы ережелерді кеңейте түсіндіру болып табылады және әкелінетін барлық дәрілік заттар санатына бірдей қолданылмайды», деді Тимур Жаркенов.

Осыған жауап ретінде Мемлекеттік кірістер комитеті төрағасының орынбасары Жәнібек Нұржанов барлық дәрілік заттарды импорттау кезінде негізгі талаптар бар екенін түсіндірді. Атап айтқанда, фармацевтикалық немесе медициналық қызметке лицензияның болуы, мемлекеттік тапсырыс аясында жеткізілетін препараттар үшін тиісті шарттардың жасалуы және жеткізушінің тауарды мақсатты пайдалану жөніндегі міндеттемелері қажет.

Сонымен бірге нысаналы мақсатын растау талабы тек дәрілік субстанциялар мен өндірісте қолданылатын балк-өнімдерге қатысты екені нақтыланды. Ал дайын дәрілер үшін стандартты құжаттар пакеті жеткілікті.

Талқылау қорытындысында ережелерге өзгерістер енгізу және кеденнің аумақтық бөлімшелеріне жедел нұсқаулықтар жолдау туралы шешім қабылданды.

Дәрі-дәрмектер мен медициналық қызметтердің тізбесі ҚҚС-тан босатылды

ҚҚС және дәрі-дәрмек қолжетімділігі

Күн тәртібіндегі екінші маңызды мәселе – салықтық жеңілдіктер. Белгілі болғандай, кейбір дәріханалар сирек кездесетін және әлеуметтік маңызы бар ауруларды емдеуге арналған препараттарды сатып алудан бас тартып отыр. Бұған жеткізушілердің 5 және 16 пайыздық мөлшерлемелерді қолдануы себеп. Заң бойынша мұндай дәрілер барлық өткізу кезеңдерінде қосылған құн салығынан босатылуға тиіс.

«Атамекен» ҰКП бастамасымен бұл олқылықты жою үшін Медициналық және фармацевтикалық бақылау комитеті Мемлекеттік кірістер комитетімен бірлесіп, қысқа мерзімде ортақ ұстаным әзірлейтін болды. Бұл шешім жеңілдікке жататын препараттарды қайтадан кең саудаға шығаруға мүмкіндік бермек.

Сондай-ақ отырыста баға қалыптастыру тәртібі де нақтыланды. Салық төлеушінің шекті бағадан тыс ҚҚС есептеуге құқығы ресми түрде бекітілді. Себебі шекті баға – тек ең жоғары рұқсат етілген деңгей, ал нақты сату бағасы салық заңнамасына сәйкес қалыптасады.

Импортталатын дәрі-дәрмек шикізаты салықтан босатылады

Бизнестің бейімделуі жалғасып жатыр

Жаңа нормаларға бейімделу үдерісі әлі де жүріп жатыр. Соңғы аптада уәкілетті органдарға 16,1 мың өтініш түскен. Бұл көрсеткіш жоғары болғанымен, оң динамика байқалады: алдыңғы кезеңмен салыстырғанда сұрақтар саны 3,4 мыңға азайған. Өтініштердің басым бөлігі әкімшілендіру мәселелеріне қатысты.

Отырыста қаралған барлық кейстер жуырда ресми ресурстарда түсіндірме ретінде жарияланып, кәсіпкерлерге нақты бағыт-бағдар берілмек.