Демалыс айыппұлға айналуы мүмкін Еуропаның қай елдерінде туристерге жиі айыппұл салынады

Қарапайым сурет, көшеде суға түсу киімімен жүру немесе рұқсат етілмеген жерде ішімдік ішу демалыстың шырқын бұзуы мүмкін. Туристер арасында жүргізілген зерттеу Еуропаның қай елдерінде саяхатшылар айыппұлға жиі тап болатынын және қандай заңбұзушылықтар үшін жазаланатынын көрсетті, деп хабарлайды Tengri Travel Express Daily-ге сілтеме жасап.

Еуропаның қай елдерінде туристерге жиі айыппұл салынады?

Confused компаниясы жүргізген зерттеуге Ұлыбританиядан екі мыңнан астам турист қатысты. Нәтижесіне сәйкес, әрбір төртінші респондент шетелде байқаусызда, тіпті өзі де білмей заң бұзған болуы мүмкін екенін мойындады.

Саяхатшыларға шетелде айыппұл салынған жағдайлар ішінде Франция бірінші орында тұр - оған оқиғалардың 32 пайызы тиесілі.

Алғашқы үштікке мына елдер кірді:

Франция - 32 пайыз; Испания - 27 пайыз; Италия - 27 пайыз.

Бұл ретте заң немесе жергілікті мәдени нормаларды бұзғанын мойындаған саяхатшылардың 26 пайызы жергілікті билік органдарынан ескерту алғандарын айтты.

Айыппұл арқалағандардың тағы 30 пайыздан астамы 200 еуродан (шамамен 105 мың теңге) көп төлеуге мәжбүр болғанын, ал заң бұзушылардың алты пайызы қамауға алынғанын жеткізді.

Айыппұлдың орташа мөлшері шамамен 160 еуро (шамамен 85 мың теңге) болды.

Еуропада әдетте не үшін айыппұл салынады?

Туристке болмашы болып көрінуі мүмкін кейбір ережелер басқа елде жазаға әкеп соқтыруы ықтимал.

Айыппұл көбіне қоршаған ортаны ластау және басқа да экологиялық заңбұзушылықтармен байланысты болған. Сонымен қатар зерттеуде мынадай себептер көрсетілген:

жағажайда және қоғамдық орындарда қоршаған ортаны ластау және басқа да экологиялық заңбұзушылықтар - айыппұлдардың 32 пайызы; діни және мәдени орындарға барған кезде лайықсыз киім кию - 27 пайыз; тыйым салынған жерлерде суретке немесе видеоға түсіру - 23 пайыз. Сарапшы не деп ескертті?

Confused.com сайтының туристік сақтандыру бойынша сарапшысы Том Воган сапарға шықпас бұрын жергілікті заңдар мен ережелерді тексеріп алуға кеңес берді. Оның айтуынша, бір елде рұқсат етілген немесе қалыпты деп саналатын нәрсеге екінші елде тыйым салынуы мүмкін.

"Көптеген ереже күткендей бола бермейді. Суретке түсу, діни орындарда лайықсыз киіну, қажетті құжаттарсыз дәрі-дәрмек тасымалдау немесе рұқсат етілмеген жерде алкоголь ішу сияқты қарапайым нәрселердің өзі кейбір елдерде айыппұлға немесе одан да ауыр зардапқа әкелуі мүмкін", - деп ескертті ол.

Сонымен қатар сарапшы туристік сақтандыру жергілікті заңдарды бұзғаны үшін салынған айыппұлды өтемейтінін атап өтті. Неғұрлым күрделі жағдайларда, егер ұсталу салдарынан саяхатшы елде жоспарланғаннан ұзақ қалуға мәжбүр болса, сақтандыру қосымша шығындарды да өтемеуі мүмкін.

Сондықтан мамандар сапар алдында көрікті жерлер мен бағыттарды зерттеп қана қоймай, жергілікті заңдар мен салт-дәстүрлерді де біліп алуды ұсынады. Бұл жағымсыз жағдайлар мен күтпеген шығындардан аулақ болуға көмектеседі.

Айта кетейік, 28 тамыздан бастап Таиландта шетелдіктерді депортациялаудың жаңа ережесі күшіне енді. Құжатта туристің қандай заңбұзушылықтар үшін елден шығарылуы мүмкін екені және мұндай шешім қабылданғаннан кейін қандай салдар болатыны жазылған.

Тағы оқыңыз: Италияда туристерге ерсі әдеті үшін 260 мың теңге айыппұл салынуы мүмкін

Google News арқылы жаңалықтарымызды қадағалаңыз

Жазылу