Италияда туристерге ерсі әдеті үшін 260 мың теңге айыппұл салынуы мүмкін

Танымал курорттарда туристер жағажайдан жақсы орынды алдын ала иеленіп қалуға жиі тырысады: кешкісін қолшатыр, сүлгі немесе орындық қалдырып кетіп, таңертең қайта оралады. Италияда мұндай әдетпен күресуді ұйғарды. Енді қоғамдық жағажайда орынды осылай "брондағаны" үшін мүлкінен айырылып, 500 еуроға дейін айыппұл арқалауы мүмкін, деп хабарлайды Tengri Travel Express Daily басылымына сілтеме жасап.

Не нәрсеге тыйым салынған?

Италия билігі келесі күні жақсы орынға ие болу үшін тегін жағажайларға түнде заттарын тастап кететін туристерге қарсы шара қолдануды жөн көрді.

Орынды "брондаудың" мұндай тәсілі үшін 500 еуроға дейін (шамамен 268 мың теңге) айыппұл салынуы мүмкін. Қалдырылған қолшатырлар, орындықтар, шезлонгтар мен өзге де заттар жинап алынады. Тәркіленген мүлікті қайтару оңай емес: ол үшін бюрократиялық процедуралардан өту қажет болуы мүмкін.

Тексеру шаралары Италияның түрлі жағалау аймақтарында жүргізіліп жатыр.

Мәселен, Неаполь маңындағы Торре-дель-Грекодағы Лагетто жағажайында жағалау күзеті мен полиция қызметкерлері 40-қа жуық қолшатырды, орындық пен үстелді жинап алды. Liverpool Echo басылымының мәліметінше, кейбір заттар ол жерде екі күннен астам уақыт тұрған болуы мүмкін.

Шілде айында Кастеллабатада жүргізілген тексеріс кезінде 200-ге жуық қолшатыр, шезлонг, орындық пен басқа да бұйымдар тәркіленді. Соның нәтижесінде жағажайдың 3000 шаршы метрден астам аумағы қайтадан барлық демалушы үшін қолжетімді болды.

Осыған ұқсас тексерулер Сицилияда және Италияның басқа да жағалау аудандарында өтті. Кампомаринода 170-ке жуық қалдырылған зат жиналып, жағажайдың 10 000 шаршы метрден астам аумағы босатылды.

Саяхат жөніндегі сарапшы Грациано Гальярди Италиядағы тегін жағажайлар қоғамдық аумаққа жататынын түсіндірді. Сондықтан турист тек заттарын қалдыру арқылы учаскені алдын ала иелене алмайды.

"Туристер бұған қонақүйдегі шезлонгқа сүлгі тастап кетудің жағажайлық баламасы ретінде қарауы мүмкін. Айырмашылығы сол, Италияның тегін жағажайы - қоғамдық жер, сондықтан жабдықтарды түнге қалдыру жай ғана ұқыпсыздық емес, жерді рұқсатсыз иеленіп алу болып саналуы мүмкін", - деді ол.

Гальярдидің айтуынша, қолшатырды, орындықты немесе басқа заттарды түнге қалдырған адам іс жүзінде қоғамдық жағажайдың бір бөлігін иелеп, өзге демалушылардың бұл орынды пайдалануына кедергі келтіреді.

"Бұл айыппұлдар билікке қараусыз қалған сүлгілер ұнамағандықтан ғана енгізіліп отырған жоқ. Ережелер қоғамдық жағалау сызығына қолжетімділікті сақтау және адамдардың жағажайдың ең жақсы тұстарын бірнеше күн қатарынан заңсыз иемденуіне жол бермеу үшін жасалған", - деп атап өтті сарапшы.

Бұдан бөлек, қалдырылған заттар жағажайды тазалауға және шұғыл қызметтердің жұмысына кедергі келтіруі мүмкін. Сондай-ақ қатты жел немесе ауа райы құбылған кезде қолшатырлар қауіп төндіруі ықтимал.

"Жабдықтар практикалық қиындықтар тудыруы да мүмкін. Құмда қалған орындықтар, үстелдер мен қолшатырлар жағажайды тазалауға, шұғыл қызметтердің өтуіне және таңғы қауіпсіздік тексерістерін жүргізуге кедергі келтіреді. Бекітілмеген қолшатыр түнде ауа райы бұзылса, қауіпті болуы мүмкін", - деді ол.

Сонымен қатар турист қысқа уақытқа жоқ болғаны үшін бірден айыппұл арқаламайды. Егер адам суға түсуге немесе су ішуге аз уақытқа кетсе, бұл заттарды таң атқанша қалдыру сияқты бұзушылық болып есептелмейді.

"Егер сіз жағажайда жүріп, теңізге сәл уақытқа кіріп кетсеңіз, бұл жағажайға орындық қалдырып, келесі таңға дейін қонақүйге қайтып кетумен бірдей емес", - деп ескертті сарапшы.

Туристер үшін ереже қарапайым: егер жағажайдан күні бойына кететін болсаңыз, барлық затыңызды өзіңізбен бірге алып кетіңіз. Сонда, сарапшының айтуынша, ешқандай мәселе туындамайды.

Тағы оқыңыз: Кения туристер үшін жаңа ереже енгізеді

Google News арқылы жаңалықтарымызды қадағалаңыз