Туристерге Токионың танымал ауданында тұруға тыйым салынуы мүмкін

Токионың ең танымал аудандарының бірінде туристер үшін қысқа мерзімге баспана жалдау қиындауы мүмкін. Синдзюку ауданының тұрғындары шу мен қоқысқа қатысты жиі шағымдана бастаған, сондықтан қазір мұнда ережелерді өзгерту мәселесі қарастырылып жатыр, деп хабарлайды Tengri Travel The Japan Times басылымына сілтеме жасап.

Жалға беруге қай жерлерде тыйым салынбақ?

Сөз "минпаку" деп аталатын - туристерге қысқа мерзімге жалға берілетін жеке үйлер мен пәтерлер туралы болып отыр.

Ұйықтайтын аудандар мен оқу орындарының маңында туристерге баспана жалдауға толықтай тыйым салу жоспарланған. Қазіргі уақытта жылжымайтын мүлік иелеріне қонақтарды демалыс күндері - жұманың түскі уақытынан дүйсенбінің түскі уақытына дейін қабылдауға рұқсат етілген. Жуырда бұл мүмкіндікті толығымен жою көзделіп отыр.

Жұмыс істеп тұрған нысан иелеріне бизнесін қайта бейіндеу немесе жабу үшін өтпелі кезең беріледі. Қазан айында әкімшілік қала тұрғындары арасында сауалнама жүргізеді, ал ақпан айында тиісті заң жобасын қарауға ұсынады.

Ықтимал тыйым Синдзюкуде жұмыс істейтін 4000-ға жуық минпаку нысандарының жартысына жуығына әсер етуі мүмкін.

Ережені қатаңдатудың негізгі себебі - жергілікті тұрғындардың шағымдары.

Егер 2021 қаржы жылында Синдзюку әкімшілігінде 82 шағым тіркелсе, 2025 қаржы жылында олардың саны 1334-ке дейін өсті.

Тұрғындарды негізінен түнде шулайтын топтар, қоқыс сұрыптау ережелерін сақтамау және белгіленбеген жерлерде темекі шегу мәселелері мазалайды.

Билік проблемалы нысандардың иелерін жазалауды бастап кетті. 2025 жылдың желтоқсанынан бастап бес оператордың 15 нысанға қатысты лицензиясы қайтарылып алынды, сондай-ақ оларға бұл салада үш жыл бойы жұмыс істеуге тыйым салынды. Алайда әкімшілік тек санкциялардың жеткіліксіз екенін алға тартады.

"Тіпті жосықсыз операторларға қарсы неғұрлым қатаң шаралар қолдансақ та, шағымдар саны азаймайды. Сондықтан біз қаулыны өзгертуді жөн көрдік", - деп мәлімдеді Синдзюку ауданы әкімшілігінің өкілі.

"Минпаку" - бұл жеке үйлер мен пәтерлерді қысқа мерзімге жалға берудің жапониялық ресми жүйесі. Ол 2018 жылы ірі спорттық іс-шаралар қарсаңында қонақүй нөмірлерінің тапшылығын шешу және бос тұрған тұрғын үй қорын пайдалану мақсатында іске қосылған болатын.

Бұл идея өте сәтті болды: қазір Жапонияда мұндай 42 мыңнан астам нысан бар және олардың оннан бір бөлігі дәл осы Синдзюкуде орналасқан. Тек осы көктемнің өзінде шетелдік қонақтар мұнда 1,7 миллионнан астам түн өткізген.

Дегенмен, басқа аймақтар да осындай қолайсыздықтарға тап болды - мәселен, Киото билігі де ұйықтайтын аудандарда тұрғын үйді жалға беруді шектеу мүмкіндігін қарастырып жатыр.

Бұл тыйымнан бөлек, Киотода туристер үшін басқа да шектеулер қолданыста. Мысалы, 2024 жылдан бастап Гион ауданында туристерге кейбір жеке тұйық көшелерге кіруге тыйым салынды. Мұндай шешім туристердің мазасыз мінез-құлқы мен тар көшелердегі халықтың көптігіне байланысты қабылданды.

Тыйым туралы жапон және ағылшын тілдеріндегі арнайы белгілер ескертеді, ал ережені бұзғаны үшін 10 000 иена (шамамен 290 мың теңге) көлемінде айыппұл салынуы мүмкін.

Айтпақшы, Токио билігі туристерге арналған ережелерді қатайтып жатқанымен, Жапония бойынша әлі де біршама үнемді саяхаттауға болады. Қазақстандық Әміржан Емберген мұны өз тәжірибесімен дәлелдеді: 22 жастағы азамат Күншығыс елінде 12 күн өткізіп, бар болғаны 809 мың теңге жұмсаған.

Google News арқылы жаңалықтарымызды қадағалаңыз