Металл іздегіштерді лицензиясыз пайдалануға тыйым салынуы мүмкін

- Біз тек ескерткіштерді емес, сонымен бірге тарихи құндылығы жоғары жәдігерлерді де жоғалтып жатырмыз. Құнды заттар шетелге кетіп, «қара нарықта» сатылып жатыр. Көп жағдайда оларды металл іздегіштер мен арнайы құрылғылар арқылы тауып алады. Сондықтан заң жобасында металл іздегіштер мен осындай құрылғыларды лицензиясыз пайдалануға тікелей тыйым салу ұсынылған. Бұл — тарихи мұрамызды тонаудан, қорғауға бағытталған нақты қадам деп ойлаймыз, - деді Асхат Аймағамбетов.

Осы орайда ол әлі де талқылауды қажет ететін бірнеше мәселені атады.

- Бірінші мәселе - жер кадастрына ескерткіштердің қорғау аймақтарын енгізу. Бұл не үшін керек? Құрылысты бастағанға дейін азаматтар осы базадан тарихи-мәдени ескерткіштердің бар екенін білуі тиіс. Қазір ондай ақпарат жоқ. Сондықтан осындай жерлерге құрылыс салу қауіпі бар. Бұл түзету бойынша Үкіметтің қолдауы қажет, - деді ол.

Мәжіліс депутаты екінші мәселе ретінде Мемлекет басшысы осы салада жауапкершілікті қатаңдату туралы нақты тапсырма бергенін, осыған орай заң жобасында арнайы нормалар ұсынылғанымен Үкімет қолдамағанын айтты.

- Екінші оқылымға дейін бұл мәселе қайта қаралып, Президенттің тапсырмасы орындалуы қажет. Тағы бір мәселе – жергілікті тарихи-мәдени мұраны қорғау инспекцияларының жұмысы. Бүгінде олар қағаз жүзінде бар. Алайда ешқандай құзыреті, бақылау тетігі мен ресурсы жоқ. Осы жүйені реттемейінше, нақты бақылау орнату қиын, - деді депутат.

Айта кетейік, Мәжіліс заңсыз археологиялық қазба жұмыстарын тыятын заң жобасын талқылап жатыр.