Испанияда танымал зиянды әдетке тыйым салынуы мүмкін

Испания темекі шегуге тыйым салынған орындар тізімін кеңейтуге дайындалып жатыр. Министрлер кеңесі тиісті заң жобасын мақұлдап қойды: егер құжатты парламент қолдаса, жаңа шектеулер тек темекіге емес, сонымен қатар никотин тұтынуға арналған танымал құрылғылардың көпшілігіне де қатысты болады, - деп хабарлайды Tengri Travel.

Испания Денсаулық сақтау министрлігі мәліметінше, құжат темекі түтінінен азат аймақтар тізімін кеңейтуді көздейді, балалар мен жасөспірімдерді қорғау шараларын күшейтеді, сондай-ақ заңнаманы жаңа никотиндік өнімдердің таралуына сәйкес келтіреді. Министрлік бұл реформаны кейінгі он жылдан аса уақыт ішіндегі антитемекі заңнамасының ең ауқымды жаңартылуы деп атап отыр.

Темекі шегуге қай жерлерде тыйым салынбақ?

Басты өзгерістердің бірі - темекі шегуге тыйым салынатын қоғамдық орындар тізімінің кеңеюі.

Егер заң қабылданса, келесі орындарда темекі шегуге болмайды:

барлар, дәмханалар мен мейрамханалардың террасаларында; теңіз және өзен жағажайларында; ортақ пайдаланудағы бассейндерде; спорт нысандарында; ұлттық парктерде; қызметтік автокөліктерде (егер олар тек жеке мақсатта пайдаланылмаса); бұқаралық іс-шаралар өткізілетін аумақтарда, соның ішінде театр қойылымдары, киносеанстар, концерттер және ашық аспан астындағы басқа да оқиғалар кезінде.

Сонымен қатар, заң жобасы қоғамдық нысандардың айналасында арнайы қорғаныс аймақтарын құруды қарастырады. Құжатқа сәйкес, мемлекеттік мекемелер, ауруханалар, емханалар, әлеуметтік орталықтар, мектептер, университеттер, ғылыми ұйымдар, мұражайлар, кітапханалар, мәдени мекемелер, спорт кешендері, сондай-ақ балалар алаңқайларының кіреберісінен 15 метрден кем радиуста темекі шегуге тыйым салынады.

"Реформа темекі түтінінен азат кеңістіктерді кеңейтеді, балалар мен жасөспірімдерді қорғауды күшейтеді және заңнаманы темекі тұтынуға байланысты жаңа өнімдерге бейімдейді", - дейді Денсаулық сақтау министрлігі өкілдері.

Кәмелетке толмағандарға арналған тыйым

Тағы бір жаңашылдық - 18 жасқа толмаған тұлғалардың темекі өнімдерін тұтынуына тікелей тыйым салу.

Осы уақытқа дейін Испания заңнамасы кәмелетке толмағандарға темекі бұйымдарын сатуға және беруге тыйым салғанымен, олардың темекіні тікелей тұтынуына қатысты бөлек тыйым болмаған еді. Жаңа заң бұл олқылықтың орнын толтырады.

Бұл ретте министрлік жасөспірімдер арасында күнделікті темекі шегетіндер саны азайғанына қарамастан, мәселенің әлі де өзекті екеніне назар аударады.

ESTUDES 2025 зерттеуінің мәліметтері бойынша, 14 пен 18 жас аралығындағы испаниялықтардың 4,3 пайызы күнделікті темекі шегеді - бұл 1994 жылдан бергі бақылау тарихындағы ең төменгі көрсеткіш. Дегенмен, соңғы айда осы жас тобындағы жасөспірімдердің 15,5 пайызы темекі тұтынған.

Электрон темекілер кәдімгі темекімен теңестіріледі

Заң жобасы электрон темекілерге және никотин тұтынуға арналған басқа да заманауи құрылғыларға қатысты.

Құжат құрамында никотині бар немесе жоқ электрон темекілерге де дәстүрлі темекілерге қолданылатын шектеулерді енгізуді ұсынады. Осындай ережелер кальянға, темекі шегуге арналған шөп қоспаларына және темекі шегу процесіне еліктейтін басқа да бұйымдарға қолданылмақ..

Тек никотин пакеттері (снюс) үшін ерекшелік жасалған: оларды темекі шегуге тыйым салынған аймақтарда қолдануға тыйым салынған өнімдер тізіміне енгізу жоспарланбаған. Алайда кәмелетке толмағандарға оларды қолдануға тыйым салынады.

Сонымен қатар, билік электрон темекілер мен басқа да соған байланысты өнімдерді сатуды тек мамандандырылған дүкендермен шектеуді ұсынып отыр. Мұндай сауда нүктелеріне қойылатын талаптарды кейінірек министрліктің жеке бұйрығы айқындайды.

Денсаулық сақтау министрлігі бұл шараның жасөспірімдер арасында мұндай құрылғылардың танымалдылығының артуымен байланысты екенін түсіндірді. ESTUDES 2025 зерттеуіне сәйкес, 14 пен 18 жас аралығындағы жасөспірімдердің 49,5 пайызы электрон темекіні кем дегенде бір рет байқап көрген, ал соңғы ай ішінде оны пайдаланғандардың үлесі 2019 жылғы 14,9 пайыздан 2025 жылы 27,1 пайызға дейін өскен.

Жарнамаға қойылатын жаңа шектеулер

Сондай-ақ заң жобасы темекі өнімдерін жарнамалау мен ілгерілету ережелерін айтарлықтай қатаңдатады.

Тыйымды жарнаманың барлық түріне, соның ішінде интернетке, сауда автоматтарына және кез келген тікелей немесе жанама ілгерілету нысандарына қолдану ұсынылады.

Бұдан бөлек, мамандандырылған дүкендерге көшеден көрінетін жарнамалар мен маңдайшаларды орналастыруға тыйым салынады.

Өзгерістер медиакеңістікке де әсер етеді. Құжатқа сәйкес, бағдарламаларда, бейнероликтерде және басқа да аудиовизуалды контентте жүргізушілер, қатысушылар мен шақырылған қонақтар темекі шегу немесе темекіге қатысты құрылғыларды пайдалану процесін көрсете алмайды, сондай-ақ мұндай өнімдерге қатысты брендтерді, логотиптерді және басқа да элементтерді атай немесе көрсете алмайды.

Сонымен қатар, аудиовизуалды коммуникация туралы заңға өзгерістер енгізіліп, коммерциялық жарнамаға тыйым жаңа никотинді бұйымдарға, оларды қолдануға арналған құрылғыларға және өндіруші компанияларға да қолданылатын болады.

Өзгерістер қашан күшіне енуі мүмкін

Министрлер кеңесі мақұлдағаннан кейін заң жобасы Испанияның Бас кортестеріне жіберіледі, онда құжат парламенттік қараудан өтуі тиіс.

Денсаулық сақтау министрлігі мәліметінше, заң Испанияның ресми мемлекеттік газетінде жарияланғаннан кейін 20 күн өткен соң күшіне енеді. Осыдан кейін темекі шегуге тыйым салынған орындарда жаңа ескерту белгілерін орнату үшін екі айлық өтпелі кезең қарастырылады.

Министрлік бұл реформа 2024–2027 жылдарға арналған Темекі шегудің алдын алу және бақылау жөніндегі кешенді жоспардың бір бөлігі екенін атап өтті. Ол "заңнаманы қазіргі тұтыну шындығына сәйкес жаңартуға, халық денсаулығын қорғауға, қоғамдық орындарда темекі түтіні мен аэрозольдердің әсерін азайтуға, балалар мен жастар арасында тұтынудың басталуына жол бермеуге және темекіден бас тартуға ықпал етуге" бағытталған.

Тағы оқыңыз: Саяхатшыларға Испания мен Францияға барудан бас тарту ұсынылды

Google News арқылы жаңалықтарымызды қадағалаңыз

Жазылу