Денсаулық сақтау министрі ата аналарды ерекше мұқият болуға шақырды

АСТАНА, 8 желтоқсан – Sputnik. Ел бойынша 622 стоматологиялық ұйымға қатысты жоспардан тыс тексеріс жүргізіліп жатыр. Бұл туралы денсаулық сақтау министрі Ақмарал Әлназарова әлеуметтік желідегі парақшасында жазды, деп хабарлайды Sputnik Қазақстан.

"Соңғы уақытта, әсіресе жекеменшік стоматологиялық клиникаларда жалпы наркозбен балалардың бірнеше тісін бір мезетте емдеуге қатысты арыздар жиілеп жатыр", - деп атап өтті министр.

Оның айтуынша балаларды жалпы анестезиямен емдеу – қатаң медициналық көрсетілімдер бойынша ғана жүргізілуге тиіс күрделі медициналық емшара.

"Клиника жекеменшік болсын немесе мемлекеттік болсын, мұндай манипуляциялар үшін білікті анестезиологтың қатысуы, тиісті жабдықтардың болуы, анестезиологиялық және реаниматологиялық көмек стандарттарын сақтау талап етіледі", - дейді ол.

Айтуынша, Бас прокуратураның талабы бойынша ел бойынша стоматологиялық ұйымдарға – барлығы 622 нысанға қатысты жоспардан тыс тексерулер жүргізіліп жатыр.

"290 тексеру тіркелді, 135-і аяқталды, 103-і жұмыс барысында, 52-і тіркеуден алынған (клиникалар іс жүзінде жұмыс істемейді), 26-і тіркеу сатысында", - деп түсіндірді Әлназарова.

Өңірлердің прокуратурасы жіберген 316 нысанның ішінде:

34 клиника МӘМС/ТМККК шеңберінде қызмет көрсетеді,

282 – тек ақылы негізде жұмыс істейді.

Ұзақ наркоз және ауқымды бір мезгілде емдеу баланың жүрек-қантамыр, тыныс алу және жүйке жүйесі тарапынан асқыну қаупін арттыруы мүмкін.

"Өкінішке қарай, жекелеген клиникалар барлық тісті бір ретте емдеп береміз деп, ата-аналарға коммерциялық тұрғыдан қолайлы нұсқаны ұсынады. Алайда мұндай тәсіл нақты медициналық көрсеткіштер болған жағдайда, тексерумен расталған кезде ғана орынды. Ата-аналарды ерекше мұқият болуға шақырамын", - деді министр.

Осындай процедураларға келісім бермес бұрын, тәуекелдер, көрсеткіштер және жүргізу шарттары туралы толық әрі ашық ақпаратпен танысу қажет.