Денсаулық сақтау министрлігі жүргізушілердің медициналық тексеруден өтуіне түзетулер енгізеді

Денсаулық сақтау министрлігі жүргізушілерге медициналық қарап-тексеруден өту қағидаларына түзетулер жобасын жария талқылауға шығарды. Жоба 2026 жылдың 19 қазанына дейін талқылауда болады, - деп хабарлайды Tengri Auto.

Басты жаңалық цифрландыруға қатысты: медициналық тексеру нәтижелері туралы мәліметтерді бірыңғай автоматтандырылған мәліметтер базасына беру жоспарланған. Бұл мемлекеттік органдар арасында ақпарат алмасуды жеңілдетуге және жол қауіпсіздігін арттыруға мүмкіндік береді.

Жобаға сәйкес, жүргізушілердің медициналық рұқсаты, сондай-ақ медициналық қорытындымен расталған қарсы көрсетілімдердің бар-жоғы туралы ақпарат автоматты түрде ақпараттық мәліметтер базасына беріледі. Бұл медициналық рұқсаттың өзектілігін жедел тексеруге және дұрыс емес немесе ескірген ақпаратты пайдалану қаупін азайтуға мүмкіндік беруі тиіс.

Еске салайық, 25 тамыздан бастап Қазақстанда жүргізуші куәлігінен айырудың жаңа негіздері енгізілді. Соның бірі көлік тізгініндегі 65 жастан асқан қазақстандықтардың медициналық тексеруден уақтылы өтпеуіне қатысты. 65 жастан асқан жүргізушілер үшін екі жылда бір рет медициналық комиссиядан өту талабы жаңалық емес, ол 2014 жылдан бері қолданыста. ІІМ мәліметінше, өзгерістер тек мемлекеттік органдар арасындағы деректер алмасуға қатысты.

"Егер адам міндетті медициналық тексеруден уақтылы өтпесе, жүргізуші куәлігінің қолданылуы автоматты түрде уақытша тоқтатылуы мүмкін. Яғни, тек осы тәртіп қана жаңа болып табылады", - деп түсіндірген болатын бұған дейін ІІМ ресми өкілі Шыңғыс Әлекешев.

Сондай-ақ ІІМ 65 жасқа толмаған жандарға асығудың қажеті жоқтығын айтты. Алғашқы міндетті медициналық тексеруден 67 жаста өту қажет. Одан кейін анықтама екі жыл бойы жарамды болады. Келесі медициналық тексеру 69 жаста, одан кейін 71 жаста және солай жалғаса береді.

65 жастан асқан жүргізушілер, сондай-ақ мүгедектігі бар жүргізушілер үшін қайта медициналық тексеруден өту мерзімі нақтыланып жатыр - екі жылда бір рет. Бұл норма "Жол жүрісі туралы" Заңда қарастырылған. Өзгерістер қолданыстағы қағидаларды заңнамаға сәйкес келтіруге бағытталған.

65 жастан асқан жүргізушілерге міндетті медициналық тексеру: бағасы және қандай дәрігерге қаралу керек?

Бізді Google-дың негізгі дереккөздер тізіміне қосыңыз