Димаш Құдайберген Алматыдағы музейге атасының домбырасын сыйға тартты

Музейдің баспасөз қызметінің хабарлауынша, олардың бірі – бала күнінде атасы сыйға берген, шығармашылық жолына серік болған қастерлі домбырасы, екіншісі – әншінің қолтаңбасы қойылған аспап.

– Бұл аспаптар біз үшін өте ыстық. Себебі бұл – әлемнің әр түкпірінен жиналған, түрлі халықтың ұлттық мұрасын танытатын құнды дүниелер. Әрқайсысының өзіндік тарихы бар. Осы аспаптарды тарту еткен барша азаматқа алғысымыз шексіз, – деді Димаш Құдайбергеннің анасы, Қазақстан Республикасының Еңбек сіңірген қайраткері Светлана Айтбаева.

Көрме Алматы музейлер бірлестігінің ұйымдастыруымен өтті. Салтанатты рәсімге Қазақстан және Қырғыз Республикасының Халық әртісі Димаш Құдайберген арнайы қатысып, көрмені өзі ашып берді.

Экспозицияға әншінің жеке қорынан 70 музыкалық аспап қойылған. Олардың қатарында әлемнің түкпір-түкпірінен жанкүйерлері тарту еткен ұлттық аспаптар бар. Сонымен бірге сахналық костюмдері де ұсынылды. Әсіресе, Майкл Джексоннің жеке стилисі Гоко Залди арнайы әзірлеген сахналық киім көрермендердің назарын аударды.

Ал музей директоры Ләззат Құдайбергенқызы Димаш Құдайбергенге Абай Құнанбайұлының домбырасының дәл көшірмесін сыйға тартты.

Көрме бір ай бойы Алматы қаласы, Зенков көшесі, 24а мекенжайындағы Ықылас атындағы халық музыкалық аспаптар музейінде жалғасады.

Еске салайық, бұған дейін Димаш Құдайберген Қысқы Олимпиада ойындарының чемпионы Михаил Шайдоровқа көлік сыйлағанын жазған едік.

Әнші спортшыға Олимпиадада өзінің орындауындағы әнді таңдағаны үшін де алғыс айтты.