Димаштың Испаниядағы алғашқы концерті өтті

Қазақстанның халық әртісі Димаш Құдайбергеннің Барселонада алғашқы жеке концерті жоғары деңгейде өтті.

Ән кешіне әлемнің елуге жуық елінен жанкүйерлер жиналды. Димаштың испан тілінде орындаған әні залды ерекше әсерге бөледі.

Әлемдік деңгейдегі әншінің өнерін тамашалауға Еуропа елдерінен ғана емес, Латын Америка, Канада, АҚШтан арнайы келген жанкүйерлер қарасы қалың болды. Димаштың репертуарындағы әндерімен қатар Қазақстанның әнұранын да жаттап алған Каталина бұл концертті асыға күткенін айтады. Бүгін міне, 11 мың шақырым жерді артқа тастап, Чилиден Испанияға арнайы ұшып келіпті.

Каталина, жанкүйер:

- Сүйікті әншімнің Испанияға келетінін естігенде қатты қуандым. Бұл күнді асыға күттім. Ән кеші әдемі өтті, ерекше әсерде тұрмын.

Мариа, жанкүйер:

- Димаштың концертіне Перуден ұшып келдім. Әншінің сахналық мәдениеті мен жоғары кәсіби шеберлігі қатты ұнайды. Жанды дауысы жаныңды бірден баурап алады.

Испанияның Мадрид, Барселона, Валенсия қалаларында Димашқа арналған тұрақты фанаттар қауымдастығы белсенді жұмыс істейді.  Ұйымдастырушылардың мәліметі бойынша, ән кешіне әлемнің елуге жуық елінен көрермендер келген. Әр жанкүйер Димашқа деген құрметін көрсету үшін қазақтың туын желбіретіп, ұлттық киім мен әшекей бұйымдарын тағып алды. Олар әдеттігідей, сүйікті әншісімен бір толқыннан табылып, қазақша әндерді бірге шырқап отырды. Димаш та концертке жиналған көрермендерін тәнті етіп, испан тіліндегі әнді орындап берді.

Монтсе, жанкүйер:

- Мен Димаштың әндеріне, әсіресе олардың мәтіні мен мағынасына үлкен мән беремін. Әншінің әр әні терең, мәні зор.  Бізді құрметтеп, испан тілінде ән шырқап берген Димашқа үлкен алғысымызды айтамыз.

Димаштың авторлық туындысы «The Story of One Sky» әні орындалған сәтте испан жанкүйерлері «Elegimos la Vida», яғни «Біз өмірді таңдаймыз» деп аталатын ерекше флешмоб өткізді. Тыңдармандар бейбітшіліктің белгісі ретінде ақ қолғап киіп, қолдарын жоғары көтерді. Флешмоб идеясы Димаштың бейбітшілік пен адамгершілікке шақырған шығармашылығынан шабыт алған жанкүйерлер: «қазақ әншісінің музыкасы тек өнер емес, тұтас әлемге арналған ізгілік пен махаббаттың үндеуі»,- дейді.

Авторлары: Аида Қыдырбай, Дмитрий Рогач