Димаштың жанкүйерлері Латын Америкасындағы ең ірі университетте Қазақстан туралы тақырыпты білім беру бағдарламасына енгізілді

Мексиканың Ұлттық автономиялық университетінде (UNAM) – сол елдегі әрі бүкіл Латын Америкасындағы ең ірі жоғары оқу орнында Азияға арналған дипломдық курс өтті. Аталған курс аясында Қазақстанның мәдениеті мен гуманитарлық әлеуетіне ерекше назар аударылды, – деп хабарлайды Aikyn.kz dimashnews.com-ға сілтеме жасап.

Бұл жобаның бастамашысы Димаш Құдайбергеннің Мексикадағы фан-клубы болды. Жоба шеңберінде Қазақстанға қатысты тақырыптар білім беру бағдарламасына енгізілді. Бұған дейін клуб өкілдері университет әкімшілігімен болашақтағы мәдени ынтымақтастық мүмкіндіктерін талқылаған болатын.

Ұйымдастырушылардың айтуынша, Қазақстанға деген қызығушылық сәуір айында Наурыз мерекесіне арналған іс-шара өткізілгеннен кейін артқан. Дәл сол кезде университет қазақстандық өнерпаздың жанкүйерлерінің қызметімен танысып, мәдени байланыстарды одан әрі дамыту жөніндегі бастаманы қолдаған еді.

Бағдарламаға қатысу үшін Орталық Азияның мәдени қауымдастығының өкілдері – Ирина Вагнер (Аргентинадағы Росарио қаласындағы Қазақстан орталығы) және Марсия Кастро (Чилидегі Casa de Asia Central ұйымы) шақырылды.

Курс барысында қатысушылар Қазақстанның білім беру мен дипломатия арқылы қалыптасатын «жұмсақ күш» саясатын, сондай-ақ заманауи поэзия мен оның өңірдің маңызды мәдени-философиялық бейнесі саналатын дала ұғымымен байланысын талқылады.

«Киіз үй жай ғана баспана емес . Ол ұтқырлыққа, табиғатпен үздіксіз үндестікке және қауымдастық сезіміне негізделген дүниетанымның көрінісі еді», – деп атап өтті Ирина Вагнер.

Сонымен қатар ол мәдени өзара ықпалдастықтың маңызын ерекше атап көрсетті.

«Шынайы күш мәжбүрлеу арқылы емес, қызығушылықты оятып, адамдар арасында байланыс орнату арқылы қалыптасады. Ұзақ мерзімді әрі мәнді ықпал мәдениет, білім және өзара алмасу арқылы жүзеге асады», – деді.

Марсия Кастро өз баяндамасын Орталық Азияның мәдени мұрасындағы табиғи кеңістіктің рөліне арнады:

«Дала мен шөл – бос кеңістік емес. Олар тарих, бірегейлік, жады және көркем шығармашылық тоғысатын жанды мекендер», – деп атап өтті.

Ұйымдастырушылар бастаманы қолдап, UNAM академиялық қауымдастығын Қазақстан мәдениетімен таныстыруға үлес қосқан спикерлерге алғысын білдірді.

Димаш Құдайбергеннің жанкүйерлерінің айтуынша, бұл жоба Қазақстан мәдениетін халықаралық деңгейде насихаттау және мәдени-гуманитарлық бастамаларды дамыту бағытындағы жұмыстардың заңды жалғасына айналды.

Сараптама, зерттеу мақала, күнделікті өзекті ақпаратты «Айқынның»  TELEGRAM   арнасынан табасыз.