Доллар бағамы 2024 жылғы маусымдағы минимумға дейін төмендеді

Қазақстандағы сауда-саттықта доллар 450 теңгеден төмен түсті. 14 қыркүйекте Қазақстан қор биржасында (KASE) қандай бағам орнағанын Tengrinews.kz тілшісі хабарлайды.

KASE-дегі күндізгі сауда-саттық қорытындысы бойынша доллардың орташа сараланған бағамы 3,17 теңгеге төмендеп, 447,80 теңгені құрады. Айта кетейік, бұл - доллар 447 теңгеге дейін арзандаған 2024 жылдың маусым айынан бергі ең төменгі көрсеткіш.

Ұлттық банктің 14 қыркүйектегі ресми бағамы - 450,91 теңге құрайды.

Алматыдағы айырбастау пунктеріндегі доллардың орташа бағамы сатып алу – 446,65 теңге; сату – 448,71 теңге. Астанадағы айырбастау пунктеріндегі доллардың орташа бағамы сатып алу – орташа есеппен 446,01 теңге; сату – 453,01 теңге. Доллар неге арзандап жатыр?

Бұған дейін экономистер Tengrinews.kz-ке теңгенің нығаюына бірнеше фактор әсер етіп жатқанын айтқан болатын. Сарапшылар Қазақстанның экспорттық кірісін демеп тұрған мұнайдың жоғары бағасын, сондай-ақ ірі экспорттаушылардың валюталық түсімді сатуын атап өтті.

Ұлттық валютаға инвестиция салудың тартымды шарттары да теңгеге қосымша қолдау көрсетеді: Ұлттық банктің базалық мөлшерлемесі жоғары деңгейде қалып отыр, сондықтан теңгелік құралдар инвесторлар үшін қызығушылығын жоғалтқан жоқ.

Сондай-ақ бағамға әлемдік валюта нарығындағы жағдай мен АҚШ Федералды резерв жүйесінің шешімдеріне қатысты болжамдар да әсер етіп жатыр. Осы факторлар фонында Қазақстан ішінде долларға деген сұраныс салыстырмалы түрде төмен болып қалып отыр.

Сонымен қатар сарапшылар теңгенің қазіргі нығаюы міндетті түрде ұзақ мерзімді болады дегенді білдірмейтінін ескертеді. Болашақта бағам динамикасына мұнай бағасы, сыртқы экономикалық ахуал, Ұлттық банктің іс-қимылдары мен валютаға деген сұраныстың өзгеруі әсер етуі мүмкін.

Бізді Google-дың негізгі дереккөздер тізіміне қосыңыз

Қосу