Дунай өзеніндегі су деңгейі тарихи минимумға дейін төмендеді

Еуропадағы екінші, ал Еуропалық Одақтағы ең ұзын өзен саналатын Дунай осы аптада рекордтық деңгейге дейін тартылып кетті, деп хабарлайды Tengrinews.kz Euronews басылымына сілтеме жасап.

Мажарстанның су шаруашылығы жөніндегі ұлттық басқармасының мәліметінше, бейсенбі, 30 шілде күні таңертең Дунайдың Будапешт арқылы өтетін бөлігінде су деңгейі 23 сантиметрге дейін төмендеді. Бұл алдыңғы күнмен салыстырғанда бес сантиметрге аз және 2018 жылы тіркелген 33 сантиметрлік рекордтық минимумнан да төмен көрсеткіш.

Мұндай табиғи аномалияға аптап пен құрғақшылық себеп болып отыр. Мажарстанды осы маусымдағы екінші аптап толқыны шарпыды.

Дунай суы жедел тартылып, құрғақ жерлер көбейіп барады. Жағдайдың ерекшелігі сондай, Мажар велосипедшілер клубының басшысы Габор Дежё Кюрти Будапешттен Вац қаласына дейін өзен арнасымен велосипед мініп өтті. Бұл 30 шақырымнан астам жол.

Вишеградтағы Матьяш патша мұражайының мамандары өзеннің құрғап қалған арнасынан табылған үлкен тас шарды зерттеп жатыр. Болжам бойынша, бұл катапультаның снаряды болуы мүмкін. Егер бұл расталса, жәдігердің жасалғанына кем дегенде 400, тіпті 2000 жыл болуы ықтимал. Содан бері ол Дунай түбінде жатқан көрінеді.

Өткен аптада Мохач маңында Дунайдың тартылған арнасынан Екінші дүниежүзілік соғыс кезіндегі кеме табылды.

Мажарстанның Қоршаған ортаны қорғау министрі Ласло Гайдош сәрсенбі күні құрғақшылықпен күрес бойынша төтенше дайындық режимін жариялады. Оның айтуынша, "су тапшылығын басқарудың 84 аймағының 66-сында құрғақшылық индексі заңмен белгіленген үш еселік шектен асып кеткен", яғни елдің төрттен үш бөлігінде судың елеулі жетіспеушілігі байқалады.

Синоптиктердің болжамына сәйкес, алдағы екі аптада мүлдем жаңбыр жаумайды. Сәрсенбіде басталған ыстық шамамен бір аптадан кейін шыңына жетеді: Будапеште ауа температурасы 39 градусқа дейін көтеріледі деп күтіледі. Тек келесі аптаның соңына қарай күн сәл салқындауы мүмкін, бірақ оның өзінде күндізгі температура 31–33 градус деңгейінде сақталады.

Google News арқылы жаңалықтарымызды қадағалаңыз