Жайық өзеніндегі су деңгейі қаншаға дейін көтерілуі мүмкін

«Қазгидромет» РМК БҚО филиалының директоры Тілеген Шапановтың мәлім еткеніндей, Ресейдің Орынбор қаласы тұсында 508 (+7, қауіпті шегі — 930 см), Елек ауданында 453 (+34, 890 см) сантиметрді көрсетті.

Сондай-ақ Батыс Қазақстан облысы аумағында Бөрлі ауданы Жарсуат ауылында 451 (+42, 1 мың см), Бәйтерек ауданы Январцевте 362 (+19), Орал қаласында 315 (+20, қауіпті шегі — 850 см), Көшімде 327 (+17), Ақжайық ауданы Мерген елді мекенінде 474 (+19), Тайпақта 206 (+19) сантиметрге жетті.

Есесіне Жайықтың саласы Шаған өзеніндегі ағыс бәсеңдеп, Бәйтерек ауданы Чувашин ауылы тұсында 27 сантиметрге (қазіргі көрсеткіш — 901 см) төмендеді.

Казталов ауданында Қараөзен көтеріліп жатыр. Мұнда Қайыңдыда 553 (+38, қауіптісі — 1 700 см), Жалпақталда 666 (+34, 860 см) сантиметр болды. Ресейлік «Гидрометеорогия және қоршаған ортаны мониторингілеу бойынша Приволжск басқармасы» федеральдық мемлекеттік бюджеттік мекемесінің 1 сәуірдегі мәліметіне қарағанда, биыл Жайықтағы су деңгейі Орынборда 500-600 (2025 жылы — 560 см), Електе 520-620 (654), Оралда 330-430 (474), Көшімде 330-430 (468), Тайпақта 250-350 (491), Атырауда 240-300 (419) сантиметр арасында болуы ықтимал.

2024 жылы Жайық Орал қаласы тұсында 865 сантиметрге дейін жетіп, қауіпті шектен асып кеткендіктен, саяжай аумақтарын су басқан еді.

Еске сала кетейік, бұдан бұрын Батыс Қазақстанда Қараөзендегі су деңгейі 630 сантиметрден асқанын жазған болатынбыз.