Дунай өзенінің тартылуы Венгриядағы жалғыз АЭС тің тоқтауына себеп болуы мүмкін

Венгрия Премьер-министрі Петер Мадьярдың мәлімдеуінше, Дунай өзеніндегі су деңгейі 134 сантиметрге дейін төмендесе, «Пакш» атом электр станциясының жұмыс істеп тұрған барлық энергоблоктарын толық тоқтатуға тура келеді.

Қазіргі уақытта Будапешттен оңтүстікке қарай 90 шақырым жерде орналасқан станция өз қуатының жартысынан аз көлемде жұмыс істеп тұр. Үкімет басшысы АЭС-ті тоқтату қауіпсіз режимде жүзеге асырылатынын және елге тікелей қауіп төнбейтінін айтты.

Қазақстандағы алғашқы АЭС құрылысының қашан басталатыны белгілі болды

Оның сөзінше, Дунайдағы су деңгейі қалыпқа келгенше станция бірнеше апта бойы қайта іске қосылмауы мүмкін. Себебі АЭС реакторларын салқындату үшін өзен суын пайдаланады, ал су деңгейінің төмендеуі қажетті көлемде су алуға мүмкіндік бермейді.

Осыған байланысты Венгрия билігі ірі кәсіпорындарды 17:00-22:00 аралығында электр энергиясын тұтынуды азайтуға шақырды. Сонымен қатар парламент отырыстарын кейінге шегеру және әкімшілік ғимараттарға сән беретін жарықтарды өшіру ұсынылды.

Балқаш пен Курчатовтан бөлек тағы бір өңірде АЭС салынуы мүмкін

Биылғы жазда Орталық және Шығыс Еуропада аптап ыстық пен құрғақшылық күшейіп, бірқатар елде ауа температурасы 40°C-тан асты. Польша, Венгрия, Румыния, Босния және Герцеговина, Хорватия, Сербия мен Словакияда ауа райына байланысты ең жоғары қауіп деңгейі жарияланды. Кейін аптап ыстық Батыс Еуропаға да жетіп, Испания мен Францияда ірі табиғи өрттердің шығуына себеп болды.