ЕАЭО елдерінің Қытаймен сауданы кеңейту мүмкіндіктері қаралды

АЛМАТЫ, 27 қазан — Sputnik. Еуразиялық экономикалық комиссияның штаб-пәтерінде Қытай Халық Республикасымен сауданы одан әрі дамыту мүмкіндіктерін қарастыру бойынша семинар өтті, деп хабарлады ЕЭК баспасөз қызметі.

Семинарға Еуразиялық экономикалық одақ елдерінің мемлекеттік билік және бизнес органдарының өкілдері, сондай-ақ сарапшылар қатысты.

"Қытай ЕАЭО-ның негізгі сауда серіктесі, оның үлесіне біздің сыртқы әлеммен барлық тауар айналымымыздың үштен бір бөлігі тиесілі. Өнеркәсіп өнімдері мен халық тұтынатын тауарлар позицияларының едәуір саны бойынша Қытайдың импорттағы үлесі айтарлықтай. Сонымен қатар қытай нарығы біздің экспорттаушылар үшін өте маңызды", – деп атап өтті ЕЭК сауда министрі Андрей Слепнев.

Қарашаның бірінші жартысында Мәскеуде Еуразиялық экономикалық одақ пен ҚХР арасындағы сауда-экономикалық ынтымақтастық туралы келісімді іске асыру жөніндегі бірлескен комиссияның кезекті отырысы өтеді. Оның тең төрағасы ЕЭК министрі болады. Семинар материалдарын іс-шараны дайындау кезінде пайдалану жоспарлануда.

Спикерлер қаржылық-есеп айырысу және техникалық кедергілерді Қытаймен саудадағы негізгі тежегіш факторлардың бірі ретінде атады. Стандарттау, санитарлық және фитосанитарлық шараларды қолдану, кедендік ресімдеу және логистика мәселелеріне, сондай-ақ зияткерлік меншік құқықтарының бұзылуына қатысты мәселелер туралы да айтылды. Бұл ретте кәсіпкерлік қоғамдастық тарапынан шағымдардың жалпы саны айтарлықтай төмендеген.