Екі есеге жуық жоғары. Алматыда үйлерді күтіп ұстаудың жаңа тарифі бекітілді

Тұрғын үйдің әр шаршы метріне 70 теңгеден төлейді. Алматы мәслихатының депутаттары үйлерді күтіп ұстау мен басқарудың жаңа ай сайынғы ең төменгі тарифін бекітті, деп хабарлайды TengriHome. Оны кімдер төлейді және бұл сомаға не кіреді?

Поделиться

Тұрғын үйдің әр шаршы метріне 70 теңгеден төлейді. Алматы мәслихатының депутаттары үйлерді күтіп ұстау мен басқарудың жаңа ай сайынғы ең төменгі тарифін бекітті, деп хабарлайды TengriHome. Оны кімдер төлейді және бұл сомаға не кіреді?

Қазір қандай тариф қолданылады?

Депутаттар ортақ мүлікті күтіп ұстау тарифін көтеру мәселесін мәслихаттың кезекті сессиясында дауысқа салып, мақұлдады. Бұған дейін тиісті жоба "Ашық НҚА" сайтында жарияланған болатын. Енді ол түпкілікті бекітілді.

Яғни, егер үйге ең төменгі тариф белгіленген болса, алматылықтар (құжат жарияланып, күшіне енгеннен кейін) үйді күтіп ұстау үшін әр шаршы метріне 70 теңгеден төлейді. Бұл қазіргі мөлшерден шамамен екі есе көп. 2025 жылдың басынан бері Алматыда шаршы метріне 40 теңгелік тариф қолданылып келген еді.

"Ең төменгі тарифті бір шаршы метріне 70 теңге мөлшерінде бекіту ұсынылады. Бұл тариф ең төменгі жалақы мөлшерін, айлық есептік көрсеткішті, сондай-ақ көппәтерлі тұрғын үйлердің ортақ мүлкін күтіп ұстауға қажетті ең маңызды шығындарды ескере отырып қалыптастырылды", - деді Алматы коммуналдық инфрақұрылымды дамыту және тұрғын үй инспекциясы басқармасының басшысы Шархан Тұрсынбаев.

Неге тариф бәріне бірдей?

Мәслихат сессиясында депутат Алтынай Көбеева жаңа және ескі үйлердің техникалық жай-күйі, тозу деңгейі, сәйкесінше оларға қызмет көрсету шығындары әртүрлі бола тұра, неге тұрғын үйді күтіп ұстауға бәріне бірдей тариф қолданылатынын сұрады?

"Былтыр қолданыста болған 40 теңгелік тариф бұл соманы әлі де өсіру қажеттілігін көрсетті", - деп жауап берді Шархан Тұрсынбаев.

"Алсеко" мәліметтері бойынша мамандар Алматыдағы үйлердің 35 пайызы қолданатын тарифке талдау жасады. Нәтижесінде оның шаршы метріне 110,5 теңгеден басталатыны белгілі болды.

Сондай-ақ тарифті көтеру туралы бастама көтергендерге тұрғын үйді күтіп ұстау шығындарын төлеу кезінде қандай да бір жеңілдіктер немесе әлеуметтік қолдау шаралары қарастырылған ба деген сұрақ қойылды.

"Әлеуметтік қолдауға келетін болсақ: бізде әр ауданда жұмыспен қамту және әлеуметтік бағдарламалар басқармасының бөлімшелері бар. Биылғы талдау бойынша қолдау шараларына 1 000-нан астам адам жүгінген. Сондықтан тұрғындар үшін есік ашық, әлеуметтік қолдау бар", - деді спикер.

Ең төменгі тариф деген не?

Ең төменгі тариф - бұл пәтер иелерінің үйді және өзге де ортақ мүлікті (шатыр, кіреберіс, жертөле, коммуникациялар) басқару мен күтіп ұстауға ай сайын төлейтін сомасы. Алматылықтар бұл төлемді түбіртектерде "тұрғын үйді күтіп ұстау" деген атаумен біледі.

Ең төменгі тарифті кімдер қолданады?

Ол пәтер иелері жалпы жиналыста басқару органын да, төрағаны да таңдамаған, сондай-ақ өздерінің бұдан жоғары жарна мөлшерін белгілемеген жағдайда қолданылады. Немесе басқару органдары бола тұра, тұрғындар тұрғын үйді күтіп ұстау тарифін ең төменгі сомадан асырып көтеруге келіспеген кезде қолданылады.

"Ең төменгі төлем" қайда жұмсалады?

Бұл ең төменгі сомаға үйді басқару мен күтіп ұстау бойынша негізгі қызметтер кіреді.

Апта сайын:

кіреберістерді, баспалдақ алаңдарын, лифт кабиналарын ылғалды тазалау.

Ай сайын:

қызметкерлердің жалақысы, сервистік компанияларға төлемдер; салықтар, жарналар, аударымдар, кеңсені ұстау шығындары; ауланы тазалау, көгалдандыру, қар мен мұздан, соның ішінде шатырды тазарту.

Жылына бір рет:

жалпы үйлік инженерлік жүйелерді маусымдық пайдалануға дайындау, жалпы үйлік есептегіш құралдарға қызмет көрсету; газ тарау, түтін және су басу белгілеріне, өртке қарсы дабыл жүйелеріне техникалық қызмет көрсету

Жылына төрт рет:

ортақ пайдаланылатын орындарды дератизациялау, дезинсекциялау және дезинфекциялау; жылыту кезеңінде - тәулік бойы; жылыту кезеңінен тыс уақытта - айына екі рет; кондоминиум нысанының инженерлік жүйелері мен жабдықтарына техникалық қызмет көрсету. Ең төменгі тарифті кім және қалай белгілейді?

Ең төменгі тарифті бекітумен жергілікті жерлерде - республикалық және облыстық маңызы бар қалалар, сондай-ақ аудандар айналысады. TengriHome мамандарының айтуынша, есептеу жұмыстарын тұрғын үй инспекциясы жүргізеді.

Негізге арнайы әдістеме алынады: ол бойынша жылдық шығындардың толық сомасы үйдегі барлық пәтердің жалпы ауданына және 12 айға бөлінеді. Нәтижесінде тұрғын үйдің бір шаршы метріне шаққандағы теңге сомасы шығады. Айтпақшы, былтырдан бастап ең төменгі тариф айлық есептік көрсеткішке байланысты болуы тиіс.

Ұсынылған ең төменгі жарна мөлшерін талқылау және бекіту мәслихат құзыретіне кіреді. Қайта есептеуді, оның ішінде инфляцияны ескере отырып, жыл сайын жүргізіп, жаңа ең төменгі тарифті бекітіп отыру қажет. Бұл туралы мәслихат сессиясында оның төрағасы Мейіржан Отыншиев те еске салды:

"Бір ғана жайт, мұны жыл басында жасау керек. Қазірдің өзінде бес айға жуық уақыт өтіп кетті, яғни біз 2026 жылға арналғанын енді ғана бекітіп жатырмыз. Сондықтан өтініш - 2027 жылға арналғанын биыл жыл соңында енгізулеріңіз керек".

Алматы коммуналдық инфрақұрылымды дамыту және тұрғын үй инспекциясы басқармасының басшысы Шархан Тұрсынбаев келесі жылдан бастап ең төменгі тариф АЕК-ке байланатынын, сондықтан оны өзгертудің қажеті болмайтынын айтты.

"Базалық" тариф қай жерде төмен, қай жерде жоғары?

Алматыдағы ең төменгі тариф ең қымбат емес. Алғашқы үштікті Көкшетау бастап тұр, онда 2026 жылдың 1 қаңтарынан бастап "базалық минимум" 72,23 теңге деңгейінде бекітілді. Одан кейін Алматы, сосын Астана орналасқан. Елордада биыл наурыздан бастап 69,2 теңгелік ең төменгі төлем қолданылады.

Тағы оқыңыз: Алматыда үйді күтіп ұстау тарифын екі есе арттыру жоспарланып отыр

Google News арқылы жаңалықтарымызды қадағалаңыз

Жазылу

Тариф Алматы тұрғын үй