Алматыда су тарифі екі есе өсті себептері аталды

Алматыда 1 қазаннан бастап су мен кәріз бойынша тариф қымбаттайды. Бұл туралы "Алматы Су" бас директорының қаржы жөніндегі орынбасары Жандос Тәкібаев мәлімдеді, - деп хабарлайды Tengrinews.kz тілшісі

Тариф қандай болмақ?

Қазір сумен қамту құны текше метріне 76,56 теңге болса, енді 178,06 теңге болады. Кәріз қызметінің бағасы текше метріне 47,50 теңгеден 119,46 теңгеге дейін өседі. Жаңа бағалар туралы толығырақ мына жерден оқи аласыз.

Қымбаттау себептері

Жандос Тәкібаевтың айтуынша, тарифтер шығындардың өсуіне байланысты өзгеріп отыр. Атап айтқанда:

Сумен қамту және кәріз жүйесі көп электр энергиясын қажет етеді – бұл шығын тарифтің шамамен 20 пайызы болады. Сонымен қатар реагенттер, материалдар, қосалқы бөлшектер мен жабдықтар қымбаттады. Жаңа тарифке сумен қамту және кәріз саласы қызметкерлерінің жалақысын көтеру шығындары да енгізілген. Соңғы екі жылда "Алматы Су" теңгеріміне 32 кәріз сорғы станциясы, алты сорғы станциясы, тоғыз таза су резервуары, 18 ұңғыма және жүздеген шақырым жаңа желілер берілді. Бұлардың барлығына қызмет көрсету, жөндеу және электр қуатымен қамтамасыз ету қажет. Инфрақұрылымның бір бөлігі тозған, сондықтан желілерді жөндеуге, жаңғыртуға және ауыстыруға қаражат керек. Жаңа тарифтің 30 пайыздан астамы инвестициялық бөліктен тұрады – бұл қаражат инфрақұрылымды жаңартуға жұмсалады.

"Тарифті түзету қаланың тіршілікті қамтамасыз ету жүйесінің тұрақты жұмысын қамтамасыз етуге, тозған желілерді ауыстыруды жалғастыруға, жабдықтарды жаңартуға және көрсетілетін қызметтердің сенімділігін арттыруға мүмкіндік береді", – деді ол.

Айта кетейік, Қазақстанда жергілікті билік халық үшін ауыз су тарифтерін өз бетінше белгілеу құқығына ие болды. Мұндай құқықты өңірлік мәслихаттарға жаңа Су кодексі береді. Енді олар бір текше метр ауыз судың құны қанша болатынын өздері анықтай алады. Бұл ретте тарифті белгілеу кезінде өңірдегі әлеуметтік-экономикалық жағдай мен сумен жабдықтаудың қолданыстағы бағасы ескерілуі тиіс.

Еске сала кетейік, Қазақстанда халық пен бизнес үшін бағаның күрт өсуін болдырмау мақсатында коммуналдық қызмет тарифтерін кезең-кезеңімен көтеру жалғасады. Толығырақ мына сілтемеден оқыңыз.

Бізді Google-дың негізгі дереккөздер тізіміне қосыңыз

Қосу