Экспедиция кезінде көлігі бұзылған шетелдік Kazinform агенттігінен көмек сұрады

Өзін Павел Маевский деп таныстырған шетелдік редакцияның электронды поштасына хат жолдады. Айтуынша, науқас балалардың еміне ақша жинау үшін 2025 жылы қайырымдылық марафонына аттанған. 

ЕАЭО территориясына Қырғызстан арқылы кірген шетелдіктің көлігі Ақтөбе жеріндегі Сағашилі ауылы маңына келгенде бұзылып қалады.

Осылайша былтыр жазда көлігін жергілікті тұрғын Ғабиден Ахановқа сеніп тапсырған. 

— Көлік бұзылған кезде жөндейтін адамды таптым. Ол машинаны қарап, қосалқы бөлшек қажет екенін айтты. Ал мұнда Fiat көлігіне қажеттісі табылмады. Сөйтіп мен Польшаға жеткен соң іздеп тауып, қайтып келетінімді жеткіздім. Мекенжайды, телефон нөмірін де жазып алдым. Бұл — Ақтөбе облысы Мұғалжар ауданы Сағашилі ауылы. Польшаға ұшақпен жетіп, механикке қоңырау шалдым. Ол маған жауап бермеді. Кейін қосалқы бөлшекті жіберіп, көлікті алып кететінімді не болмаса көлікті Қазақстанда қалдыратынымды айттым. Хабарлама жібергенде оның телефон нөмірі сөніп тұрды. Көлік құны арзан болған соң (Польшадағы бағасы 500 доллар — Павел Маевский) Қазақстанға немесе Қырғызстанға қалдыру жолын сұрадым (ЕАЭО территориясына Қырғыз Республикасы арқылы кірген — ред.). Оның өз заңдылығы бар екен, — деп жазады ол.

Шетелдік азамат бірнеше рет көлік жөндеушімен арада байланыс орнатуға тырысса да, ретін таба алмаған. Әрі өзі де сол кеткеннен Қазақстанға келмеген. 

Оның айтуынша, мұның бәрі кеден салығынан босатпайды. Ал құжатын заң аясында реттемесе ол бұдан әрі ЕАЭО аумағына кіре алмауы мүмкін.

Шетел азаматы Қазақстан мен Қырғызстанның салық комитетінен жауап та алды. Талап бойынша көлікті иесі алып кетуі тиіс немесе алдымен сәйкестік сертификатын рәсімдейді.

— Ең тиімді жолы — көлікті алып кету. Эвакуатор жалдаса да болады. Бір жылдың ішінде алып кеткені абзал. Қазақстан емес, ЕАЭО-ға кірген жері, яғни Қырғызстан шара қолданады. Егер бір рет айыппұл салса, ортақ базадан үнемі көрініп тұрады. Ал егер елде қалдыруға шешім қабылдаса алдымен сәйкестік сертификатын алады. Ол үшін көлік жөндеуден өтіп, жүріп тұруы тиіс. Сертификаттан соң кедендік рәсімдеу жүреді. Мұның бәрі уақытты қажет етеді, — дейді Ақтөбе облыстық мемлекеттік кірістер департаментінің басқарма басшысы Серік Сайманов. 

Ал көлікті алып қалған ақтөбелік Ғабиден Ахановтың айтуынша, ол алдымен жолаушыны қонақ қылып, кейін жолға шығарып салған.

Кері байланыс үшін мекенжайын, телефон нөмірін де жазып береді.

— Көлік бұзылып қалып, маған сүйреп әкелді. Сол кезде менде жөндеп беретін қосалқы бөлшек болмады. Ал олардың визасының уақыты аяқталып қалған. Такси жалдап, еліне кетті. Алдымен гаражда тұрған еді. Бірер айдан соң жөндеп, сыртқа шығарып қойдым. Өзім жөндеу жұмысын жүргіземін, тапсырыс алу үшін гараждың ішін босату керек болды. Шетелдік келіп, қаржысын төлеп алып кетсе болады. Мен 70 мың теңгеге қосалқы бөлшек алдым. Жұмысты қосып, 250 мың теңге сұраймын. Байланыс телефонын бердім, аты-жөнімді жаздым. Қазақтың салтымен қонақ болды, — дейді ақтөбелік. 

Оның айтуынша, алғашқы келісім бойынша шетелдік азамат қосалқы бөлшекті Польшадан әкелмек болған. Бірақ екеуі содан кейін хабарласа алмады. 

Kazinform көлік иесі мен ақтөбелік арасына байланыс орнатты. Павел Маевский байланыс телефонының бір ғана санын қате терген.

Ол алдағы уақытта келіп, көлігін алып кетуді жоспарлап отыр.