Ел тыныштығын күзеткен егіздер

Жамбыл облысында әскер қатарында 5 егіз Отан алдындағы борышын өтеп жүр.

Әскери комиссариат оларды бір бірінен бөлмей,  бір бөлімшеге жіберуді ұйғарған. Олардың бірі Ұлттық ұланның сапында қызмет етсе, қалғаны түзету мекемесінде тәртіпті қадағалап жүр.

Диас пен Ілияс Төлепбергендер Талғар қаласының тумасы. Егіздер бір жыл бұрын Тараздағы  5513 әскери бөліміне борышын өтеуге келген. Қару ұстап, қатарға қосылған бір үйдің балалары; жастарға үлгі болсақ, - дейді.

Диас Төлепберген, сарбаз:

- Қызмет атқарып жатқанда артымызда өсіп келе жатқан қарындастарымыз, інілеріміз бізге қарап үлгі алса екен деп қоғамдық тәртіпті, елдің тыныштығын күзетудеміз.

Ілияс Төлепберген, сарбаз:

- Егізіміз екеуміз әскери борышымызды атқарып қана қоймай, өзіміз қоғамдық тәртіптерді қадағалап, полиция қызметкерлерімен бірлесіп бірге жұмыс атқарамыз.

Сыңарымен сапта тұрған сарбаздардың қатарында Аман мен Есен, Нұрсұлтан мен Ерсұлтан да бар. Олар қазір түзету мекемесінің тәртібіне жауапты. Ал Түркістан облысынан келген 19 жастағы Эльхан мен Эльшан Нуриевтер ұлттық ұлан сапында. Ал Әділет пен Ақниет Төремұратовтар әскер қатарына 1,5 ай бұрын ғана алыныпты. Ақтөбелік егіз қазір байланыс полкінде борышын өтеп жүр.

Әділет Төремұратов, сарбаз:

- Әскери өміріміз ұнап жатыр. Әр күніміз қызықты өтіп жатыр. Әскерге өз еркімізбен келдік. Әскерден қашпаңдар. Әр ер азамат әскери борышын өтеуі керек. Ол Отан алдындағы парызы.

Рахымжан Арынтаев, 28903 әскери бөлімі батальон командирінің орынбасары:

- Ата-аналар көп жағдайда өз балаларын әскерге жіберуге қорқады. Ал бұл жерде бір үйдің екі баласы бірдей Отан алдындағы борышын өтеуге келіп тұр. Бізге жіберіп сеніп артқандары үшін ата-анасына алғысымызды айтамыз.  

Биыл күзде «Оңтүстік» өңірлік Қолбасшылығының әскери бөлімдеріне 2 мыңнан аса сарбаз қосылды. Борышын өтеуге келген бозбалалар үйлеріне темірдей тәртіп пен жауынгерлік өнерді үйреніп қайтады. Оған қоса үздік сарбаздарға елдегі 70 университеттің грантын ұтып алуға мүмкіндік бар.

Авторлары: Мерей Бает, Елдар Байділдә