Елде 17 қаржы пирамидасы тоқтатылды Президентке есеп берілді

Қасым-Жомарт Тоқаев Қазақстан Республикасының Қаржылық мониторинг агенттігі төрағасы Жанат Элимановты қабылдады. Бұл туралы Ақорда хабарлады.

Кездесу барысында Мемлекет басшысына агенттіктің қызмет қорытындылары мен алдағы кезеңге арналған міндеттері таныстырылды.

Жанат Элимановтың мәліметінше, бюджет шығыстарын мониторингтеу барысында бірқатар заңбұзушылық тәуекелдері анықталған. Атап айтқанда, мал шаруашылығы саласына бөлінген 30 млрд теңге субсидияның тиімсіз пайдаланылу қаупі белгілі болды. Сонымен қатар ғылыми зерттеулер мен ғылыми-техникалық нәтижелерді коммерцияландыруға бөлінген 10 млрд теңгеден астам қаражатты мақсатсыз жұмсау белгілері тіркелген.

Міндетті әлеуметтік медициналық сақтандыру қаражатын жымқыру фактілері бойынша 14 сотқа дейінгі тергеу басталған. Құрылыс саласында 5,3 млрд теңгені заңсыз иемденбек болғандарға қатысты 21 қылмыстық іс қозғалды.

Алаяқтықтың алдын алу бағытында 17 қаржы пирамидасының қызметі тоқтатылған. Сондай-ақ банктер мен байланыс операторларының атын жамылып, фишингтік SMS-хабарламалар таратқан топ әшкереленді. Жалпы аудиториясы 25 мыңнан асатын 3,7 мың алаяқтық сайт пен 22 топтық чат жабылған. Бұдан бөлек, 400-ден астам жалған құрылыс компаниясының заңсыз лицензия алуына тосқауыл қойылған.

Қылмыстық табыстарды жылыстатуға қарсы іс-қимыл аясында дроп-карталарға қатысты 14 сотқа дейінгі тергеу басталып, олардың айналымы 13 млрд теңгеден асқаны анықталды. «Көлеңкелі» тұлғаларға рәсімделген 68 мыңнан астам банк картасы бұғатталған.

Сонымен қатар жалған компаниялар мен құжаттарды пайдалану фактілері бойынша 23 іс тіркеліп, келтірілген залал шамамен 13 млрд теңгені құраған. Қаржы пирамидалары, онлайн-казино және алаяқтықтан түскен табысты жылыстатумен айналысқан үш жасырын криптоайырбастау қызметінің жолы кесілді. Заңсыз криптовалюта сервистеріне кіруге арналған 483 сілтеме бұғатталған.

Кездесу қорытындысы бойынша Президент агенттіктің негізгі бағыттары бойынша бірқатар нақты тапсырма берді.