Елде ауызсуды тұтынудың шекті көлемі белгіленді

Енді бір адам тәулігіне 140 литр су пайдалануы тиіс. Одан артық жұмсалса, тариф те қымбатқа түседі. 

Бұл туралы Құрылыс және тұрғын-үй коммуналдық шаруашылық істері комитетінің төрағасы Бақытжан Жүнісбеков мәлімдеді. Егер адам осы нормадан асып кетсе, онда әрбір қосымша текше метр су үшін әдеттегі тарифтен 30% артық төлеуге тура келеді. Ведомство мұндай жүйе тіршілік нәрін үнемдеуге көмектеседі деген сенімде. Тарифтерді есептеу әдістемесіне барлық қажетті құжаттар бекітілді. «Бұл тәсіл, коммуналдық қызметтердің бағасы жоғары аймақтарға қаржылық жүктемені азайтады. Су тарифтері өңірлердің әлеуметтік-экономикалық даму деңгейін ескере отырып белгіленеді» деді ведомство өкілі. Еске салайық, Су кодексіне сәйкес, мәслихаттарға ауыз судың 1 текше метріне төлем мөлшерін реттеуге рұқсат етіледі.

Нұрсұлтан Керемқұлов, ҚР ӨҚМ Құрылыс және тұрғын үй-коммуналдық шаруашылық істері комитеті төрағасының орынбасары:

- Неліктен тәулігіне 140 литр деп шектеу қойдық? Өйткені біздің есебіміз бойынша бір адамға күнделікті 140 литр су жетеді. Жуынуға, тамақ жасауға, кір жууға. Сондықтан халықты суды үнемдеуге бағытталған норма деп белгіленді. Егер 140 литрден асса, 30% қымбаттатылған тарифпен төлейді. Мысалы, маслихаттың бекіткенімен 110 теңге, бірақ 140 литрден асып кетіп жатса, 110 емес 130-135 теңге төлейтін болады.