Елде күн сайын 800 ден аса алаяқтық фактісі тіркеледі

Қазақстандықтар күн сайын дерлік өзін «банк қызметкері» ретінде таныстыратын белгісіз қоңырауларға немесе интернеттегі «жеңіл табыс» уәде ететін жарнамаларға тап болып жүр.

Qamqor.gov.kz порталының дерегіне сүйенсек, өткен жылы елде 301 768 алаяқтық фактісі тіркелген. Бұл – тәулігіне орта есеппен 800-ден астам жаңа іс деген сөз. Зардап шеккендердің жартысынан көбі – әйелдер (173 мыңнан астам жағдай).

Жалпы қылмыстардың 50 пайыздан астамы, нақтырақ айтқанда 177 325 іс интернет арқылы жасалған. Алайда олардың басым бөлігі әлі ашылмаған. Тергеу нәтижесінде сотқа небәрі 99 мың іс жолданған. Ал 132 мыңнан астам қылмыстық іс (шамамен 34%) күдіктінің анықталмауына байланысты тоқтап тұр. Интернет-алаяқтық бойынша бұл көрсеткіш тіпті жоғары – 99 881 іс.

Мамандар мұндай жағдайдың басты себебі ретінде қылмыскерлердің шетелдік серверлерді, VPN-арналарды және өзге елдердің банк карталарын кеңінен пайдалануын атап отыр. Бұл құқық қорғау органдары үшін алаяқтарды анықтап, жауапқа тартуды едәуір қиындатады.