Елімізде адам шығыны 11% ға азайды

Биыл елде 13 мың шақырым автожолды жөндеп, қайта салу көзделген. Алайда жол сапасы жақсарған сайын жолаушылардың қауіпсіздігі де басты мәселелердің біріне айналды. 

Нақтырақ айтқанда тақтайдай тегіс жолмен зулап, жылдамдықты асыратындар көп. Биыл тоғыз айда елде 26 мыңнан астам жол-көлік оқиғасы тіркелді. Салдарынан 1700-ге жуық адам опат болып, 35 мыңнан астам жарақат алды. Дегенмен Ішкі істер министрлігі де тиіс шараларды қолға алып отыр. Мәселен, күрежолдардағы орташа жылдамдық өлшеу құрылғысы өз жемісін бере бастады дейді министрлікте.

Ақтоты Боранова ҚР ІІМ әкімшілік полиция комитетінің ерекше тапсырмалар жөніндегі аға инспекторы:

- Адам шығынымен болатын апаттардың санын азайту мақсатында Ішкі істер министрлігі орташа жылдамдық ұғымын енгізген болатын. Яғни орташа жылдамдық ұғымын енгізген учаскелерде адам шығыны 11 пайызға төмендеген. Сол үшін осы орташа жылдамдықты есептеу қазіргі таңда басқа да түзу сызықты жол учаскелерінде қосу қарастырылып жатыр. 

Өлшеу құрылғыларын көбейтумен қатар рейдтік іс-шаралар жиі өтіп тұрады. Таяудағы рейд барысында 13,6 мың мәрте жол ережесі бұзылғаны анықталды. Оның ішінде мыңнан астам жүргізуші жолаушы мен жүк тасымалдау ережесін бұзған. Сондай-ақ 394 заңсыз тасымалдау дерегі тіркелсе, екі мыңға жуық көліктің техникалық байқаудан өтпегені немесе техникалық талаптарға сай келмейтіні белгілі болды. Бұлар көбіне такси жүргізушілері.