Елімізде балық шаруашылығы су айдындары 60 мың тоннаға жуық қоқыстан тазартылды

Іс-шара барысында су айдындарынан және олардың жағалау аймақтарынан 60 мың тонна қоқыс пен иесіз балық аулау торлары жиналып, жойылды.

Акция қоршаған ортаны қорғау және табиғи ресурстарды ұтымды пайдалану саласындағы мемлекеттік саясатты іске асыру аясында өткізілді.

Негізгі мақсат — су экожүйелерінің тазалығын сақтау, биоресурстардың тұрақтылығын қамтамасыз ету және халықтың экологиялық мәдениетін арттыру.

Экологиялық шараға экология департаменттерінің қызметкерлері, жергілікті атқарушы органдардың өкілдері, студенттер, еріктілер және қоғамдық ұйымдардың мүшелері қатысты.
Жалпы акцияға 1100-ден астам адам, 170 техника бірлігі, соның ішінде 59 су көлігі жұмылдырылды.

Жағалау сызығының ондаған шақырымы тазартылды.

Мұндай шараларды өткізу су сапасын жақсартуға, су айдындарының табиғи флорасы мен фаунасын қалпына келтіруге, сондай-ақ азаматтардың табиғатқа жауапкершілігін арттыруға ықпал етеді.

Айта кетейік, «Таза Қазақстан» акциясы аясында Ақтөбе өңірінде 7300-ге жуық көшет егілді.