Еліміздің бес өңірінде теміржол вокзалы жаңартылды

Фото: Көлік министрлігі

Пайдалануға берілген вокзалдардың қатарында Атырау облысындағы Мақат, Сағыз және Доссор, Алматы облысындағы Шамалған және Қазыбек бек, Қарағанды облысындағы Дария мен Мырза, Қызылорда облысындағы Сексеуіл, сондай-ақ Қостанай облысындағы Железорудная станциялары бар.

Жаңғырту барысында барлық нысандарда кешенді құрылыс-монтаж жұмыстары жүргізілді. Атап айтқанда, тірек конструкциялары, шатырлар мен қасбеттер жаңартылып, инженерлік желілер ауыстырылды. Сонымен қатар ішкі әрлеу жұмыстары аяқталып, вокзалдардың іргелес аумақтары абаттандырылды. Нысандар жаңа жиһаздармен және заманауи жабдықтармен қамтамасыз етілді.

Қарағанды облысында 3 теміржол вокзалы жаңартылды

Атырау облысындағы Мақат теміржол вокзалының аумағы қайта жаңғыртудан кейін 355,8 шаршы метрден 374,9 шаршы метрге дейін ұлғайды. Станция арқылы Қазақстанның бірнеше өңіріне, сондай-ақ Ресей, Өзбекстан және Тәжікстан бағыттарына қатынайтын 26 жолаушылар пойызы өтеді.

Сағыз вокзалының аумағы 249 шаршы метрден 348 шаршы метрге дейін кеңейтілді. Бұл станция арқылы Маңғыстау, Бейнеу, Орал, Астана, Павлодар, Семей, Тараз, Шу, Шымкент, Түркістан, Атырау, Көкшетау, Бурабай курорты және Қостанай бағыттарына қатынайтын 12 жолаушылар пойызы жүреді.

Шығыс Қазақстанда жаңғыртудан өткен алғашқы теміржол вокзалдары пайдалануға берілді

Ал Доссор теміржол вокзалының аумағы да 249 шаршы метрден 348 шаршы метрге дейін ұлғайтылды. Станция Алматы, Тараз, Шу, Шымкент, Түркістан, Қызылорда, Атырау, Астана, Көкшетау, Қостанай бағыттарымен қатар Ресей, Өзбекстан және Тәжікстанға қатынайтын 20 жолаушылар пойызына қызмет көрсетеді.

«Жаңғырту барысында отандық өндірістің құрылыс материалдары пайдаланылды. Барлық вокзал қауіпсіздік, қолжетімділік және жайлылық талаптарына сай жаңартылып, жолаушыларға көрсетілетін қызмет сапасын арттыруға мүмкіндік беретін заманауи инфрақұрылыммен жабдықталды. Вокзалдарды жаңғырту жұмыстары Мемлекет басшысының тапсырмасына сәйкес жүзеге асырылып жатыр», делінген Көлік министрлігінің хабарламасында.

Еске сала кетейік, елімізде соңғы жылдары 650-ден астам жолаушылар вагоны жаңартылған. 2030 жылға қарай министрлік жолаушылар паркін жаңарту деңгейін 90%-ға дейін жеткізуді жоспарлап отыр.