Қазақстанда 72 теміржол вокзалы жаңартылды не өзгерді

Қазақстанда 17 облыстағы 72 теміржол вокзалын реконструкциялау аяқталды. Тамыздың соңына дейін тағы 34 вокзалды пайдалануға беру жоспарланса, 15 нысандағы жұмыс қыркүйектің соңына дейін бітеді, деп хабарлайды Tengrinews.kz Үкіметтің баспасөз қызметіне сілтеме жасап.

Ел бойынша 124 вокзалды жаңғыртудың ауқымды бағдарламасы Мемлекет басшысы Қасым-Жомарт Тоқаевтың тапсырмасымен іске асырылып жатыр.

"Жұмыстар вокзал инфрақұрылымын кешенді жаңғыртуды көздейді, олар: ғимараттар мен инженерлік желілерді жаңарту, платформалар мен вокзал маңындағы аумақтарды реконструкциялау, күту залдарын кеңейту, заманауи қауіпсіздік жүйелерін, лифтілер мен көтергіш құрылғыларды орнату, сондай-ақ кедергісіз орта құру. Ең қатты тозған нысандарда ескі ғимараттар толығымен бұзылып, орнына жаңа жолаушылар кешендері салынды", - деп хабарлады Үкіметтің баспасөз қызметі.

Жалпы алғанда, 2026 жылы 124 вокзалдың 121-ін реконструкциялауды аяқтау жоспарланған. Тағы үш ірі нысан - Астана, Алматы және Түркістан вокзалдарының жұмысы 2027 жылы аяқталады.

"Олардың тарихи-архитектуралық құндылығы бар, сондықтан жұмыстар ғимараттардың бастапқы сәулеттік келбетін сақтауға қойылатын талаптарды ескере отырып, жеке кесте бойынша жүргізіліп жатыр", - деп түсіндірді Министрлер кабинетінің баспасөз қызметі.

Сондай-ақ вокзалдарды жаңғырту инфрақұрылымды артып келе жатқан жүктемеге бейімдеуге және ірі тораптық станцияларда да, өңірлерде де жолаушыларға қызмет көрсету сапасын арттыруға мүмкіндік беретіні атап өтілді.

Дереккөз: t.me/KZgovernment

"Теміржол тасымалын дамыту және вокзалдарды жаңарту аясында жолаушылар ағынының одан әрі өсуі күтіледі, бұл көлік тораптарына жүктемені арттырады және қызмет көрсетудің заманауи стандарттарын сақтауды талап етеді", - делінген хабарламада.

Бұған дейін Tengrinews.kz тілшілері Астананың ескі теміржол вокзалына барып қайтқан еді, онда қазір реставрация жұмыстары қызу жүріп жатыр. Былтыр ғана үйінді болып жатқан орында жаңа, бірақ таныс ғимараттың нобайы көріне бастады. Толығырақ мына сілтеме арқылы оқыңыз.

Google News арқылы жаңалықтарымызды қадағалаңыз