Елнұр Бейсенбаев: 2028 жылы Қазақстанның мемлекеттік қарызы 57,5 триллион теңгеге жетеді

— Қазіргі таңда мемлекеттік борыш көлемі шекті межеден асып кетті. 2028 жылға қарай жалпы қарыз 57,5 триллион теңгеге жетіп, оған қызмет көрсету шығындары 4,5 триллион теңге болады. Бұл — бюджет шығыстарының 15 пайызы. Мұндай тәуелділік — экономикалық қатердің нақты көрінісі, — деді депутат.

Мәжіліс өкілі квазимемлекеттік сектордың шамадан тыс қарызына алаңдайтынын айтты.

— 2026 жылға қарай квазимемлекеттік сектордың борышы 70 миллиард долларға жетеді. Бұл — жалпы ішкі өнімнің 20,5 пайызы. Яғни ел экономикасының айтарлықтай бөлігі осы секторға тәуелді. Осылайша, мемлекет өзін-өзі борышқа тіреп отыр. Егер осы саясатты өзгертпесек, ертең біз қарызды емес, қарыз бізді басқаратын жағдайға жетуіміз мүмкін. Бұл — тек Үкіметті ғана емес, Парламентті де алаңдататын мәселе, — деді Елнұр Бейсенбаев.

Бұған дейін Мәжіліс депутаты Ұласбек Сәдібеков те Үкімет таныстырған 2026-28 жылдарға арналған республикалық бюджет жобасының кемшіліктерін атаған болатын.