Елорда жастары Б. Момышұлы ескерткішіне гүл шоқтарын қойды

Бүгін даңқты қолбасшы, «Халық Қаһарманы»  Бауыржан Момышұлының есімі ұлықталды.

Батырдың туғанына 115 жыл толуына орай елорда жастары батырдың ескерткішіне гүл шоқтарын қойды. Бауыржан Момышұлының есімі күллі қазақ үшін әлдеқашан қайсарлық пен ерліктің символы іспеттес. Көзі тірісінде аты аңызға айналған батыр есімін бүгінгі буын мақтанышпен еске алады. Бұған бүгінгі рәсімге келген жастар дәлел. «Жас сарбаз» әскери-патриоттық қозғалысының тәрбиеленушілері мен «Астана жастарының» еріктілері астананың қытымыр аязына қарамастан, батыр рухына тағзым жасады.

Олжас Айдосұлы, «Жас сарбаз» әскери-патриоттық қозғалысының тәрбиеленушісі:

- Баршамызға мәлім Бауыржан Момышұлы атамыз керемет тұлға. Атамызды дәріптеу мақсатында біз сияқты жас сарбаздар үшін тағылымды іс-шара өтуде. Бұл жерде гүл шоқтарын қоя отыра, кешегі күнге тарихымызға үңілудеміз.

Ескерткішке гүл шоқтарын қойып, рухани шараға қатысушылар батырды бір минут үнсіздікпен еске алды.

Біртуар тұлға Бауыржан Момышұлы  сұрапыл соғыста өзінің қайтпас қайсарлығы, тапқырлығымен ерекшелене білді. Оның соғыс жылдарындағы жүрек жұтқан ерлігі мен қолбасшылық қағидаттары күні бүгінге дейін жас сарбаздарға үлгі. Батырдың ерлігін еске алған жастар оның тарих пен әскери ғылымды терең меңгерген, кей тұста өз дәуірінен озық ойлай білген тұлға болғанын мақтанышпен жеткізді.

Әлібек Жүсіпов, Астана қаласы Жастар саясаты мәселелері басқармасының өкілі:

- Бұл шараның маңыздылығы келешек ұрпаққа біздің ата-бабаларымыздың жасаған ерліктерін насихаттау оны ары қарай ұмытпау мақсатында, әскери тарихи тәрбие беру мақсатында ұйымдастырылып жатыр.

Жақында Президент Бауыржан Момышұлына «Халық қаһарманы» атағын беру туралы Жарлыққа қол қойды. Батырдың есімі нағыз отаншылдық пен өшпес ерліктің символы ретінде әрдайым көпке үлгі-өнеге екені сөзсіз. 

Авторлары: Айнұр Қуатқызы, Бақытбек Нұртаев, Мадияр Қындыбаев