Елордада нашақорлықтың алдын алуға бағытталған театр қойылымдары байқауы өтті

«Есірткісіз өмір – болашаққа қадам». Осындай атаумен бүгін елордада нашақорлық пен есірткі бизнесінің алдын алуға бағытталған театр қойылымдары байқауы өтті. 

Жеңіл ақшаның жетегіне еріп, қылмыстық істің құрбанына айналған жас өскін қатары бүгінде аз емес. Тұрмыс тауқыметін бір сәтке ұмыту үшін зиянды заттың қармағына ілігіп, кейін қайғылы жағдай кейіпкеріне айналғандар қоғамда көбеймесе кемімей тұр. Бұл мектеп оқушылары ұсынған бүгінгі қойылым тақырыптарында да кеңінен көрініс тапты.

Жәңгір Жақыпжан, №119 орта мектептің оқушысы

- Біз «Аманат» қойылымын қойып жатырмыз. Екі күн ішінде барлығымыз жабылып, сабақпен қоса фильм де түсірдік. Жеңетін болсақ, өте қуанышты боламыз.

Астана қаласы әкімдігі мен Байқоңыр аудандық прокуратурасы тарапынан қолдау тапқан байқауда бес мектептің оқушылары сынға түсті.

Дана Тогой, №55 орта мектептің оқушысы:

- Бізде бұл спектакльде, әрине нашақорлықтың қандай жаман жолға апаратынын, сонымен қатар нашақорлықтың кесірінен жақын адамдарды жоғалтып алуға болатыны жайлы айтамыз. Есірткі — ол жаман нәрсе. Миға жалған дофамин бере отырып, адамдарды өзіне қарай тарта бастайды.

Тұрарбай Бектаров, «Астана қаласының ішкі саясат басқармасы» ММ бас маманы:

- Бұл іс-шараның негізгі мақсаты – жастар арасында нашақорлықтың алдын алу. Театрлық қойылым бірінші рет өткізіліп жатыр. Алайда ойымызда бұл іс-шараны кеңейту және жасөспірім арасында тарату бар.

Сайыс «Заң және тәртіп» қағидаты аясында қолға алынды. Мақсат – жеткіншектерді тура жолдан тайдыратын зиянды әдеттерден аулақ болуға ықпал ету. 

Қазыбек би Берғалиұлы, Астана қаласы Байқоңыр аудандық прокуратурасының бөлім прокуроры:

- Қойылымдар тек оқушылардың қабілетін көрсетіп қана қоймай, олардың денсаулық, қауіпсіздік және заңға бағынушылық мәселелеріне саналы көзқарас қалыптастыруға ықпал етеді. Осындай диалог пен кездесулер және ынтымақтастық арқылы әр жас адам дұрыс таңдауға мүмкіндік алатын жағдайлар жасалып отыр.

Байқауда білім алушылар жеңімпаз атанудан гөрі, алдымен ине ұшындағы өмірдің азабын көрсетіп, қоғамдағы түйіткілді тақырыпты қаузауды көздеді. Сайыс болған жерде жеңімпаз бар. Бәйгеде 119 орта мектептің оқушылары көш басынан көрініп, 8 және 16-шы мектеп жеткіншектері де жүлделі орындарды иеленді.

Авторлары: Назым Кенжебай, Руслан Әлиев