О. Бектенов нашақорлықтың алдын алуға бағытталған штаб отырысын өткізді

Үкімет басшысы Олжас Бектенов нашақорлықтың алдын алуға бағытталған республикалық штаб отырысын өткізді.

Жиында Президенттің "Заң мен тәртіп" қағидатын орындауда атқарылған жұмыс нәтижелері қаралды. Елде  нашақорлық және ескірткі бизнесіне қарсы күрестің кешенді жоспары әзірленіп жатыр. Құжатта оқымайтын және жұмыссыз жүрген NEET санатындағы жастарға ерекше назар аударылмақ. Бұқаралық спортты дамыту, жастардың шығармашылық әлеуетін көтеру сынды мәселелер де назардан тыс қалмақ емес. Ішкі істер министрі Ержан Сәденовтың  айтуынша, биыл "Кибернадзор" жүйесінің көмегімен анықталған зиянды сайттар саны 11 есе өскен. Барлығы 26,5 мыңнан астам интернет-ресурс жабылды. 9 айда есірткіге қатысты 6 210 құқық бұзушылық әшкереленіп, 26 тоннадан астам есірткі тәркіленді. Алайда тек аталған ведомство ғана емес, аймақ атқамінерлері де зиянды әдетпен күреске атсалысуы тиіс. Премьер-министр жыл соңына дейін әкімдердің рейтингін жасақтауды тапсырды.