Елордалық оқушылар 1825 келі қоқыс жинап, байқауда жеңді

Оқушылар қоқысты сұрыптап, оны қайта өңдеуге жіберуді әдетке айналдырған. Бұл жұмыс «Таза Қазақстан» тұжырымдамасы шеңберінде өткен байқауда жоғары бағаланып, мектеп ұжымы үздік нәтиже көрсетті.

Гимназия директоры Нұрлан Ысқақовтың айтуынша, бірнеше ай ішінде істелген жұмыс көлемі айтарлықтай. Осы уақыт аралығында 1825 келі қоқыс сұрыпталып, қайта өңдеуге жіберілген.

— Байқауда 119 мектеп ұжымының арасынан суырылып шықтық. Сұрыпталған қоқысты қабылдаушыларға жөнелттік, — деді Нұрлан Ысқақов.

Эко-жетекші Оразмұхамеджанкерей Жаңабайұлының сөзінше, бастама оқушылардың көзқарасын айтарлықтай өзгерткен.

— Балалар кішкентай бастаманың аясында қоршаған ортаға құрметпен қарауды үйренді, — деді ол.

Қалдықтарды сұрыптау жұмысы арнайы экоқолдау қосымшасы арқылы жүзеге асырылады. Жоба оқушыларды жастайынан қалдықтарды дұрыс сұрыптауға үйретіп қана қоймай, экологиялық мәдениетті қалыптастыруға бағытталған. Сонымен қатар қатысушылар үшін қосымша табыс табу мүмкіндігі де қарастырылған.

Тұрақты тазалыққа негізделген бастама алдағы уақытта кеңейе түспек. Жоба елдің 15 өңірінде жалғасын тауып, мектеп оқушыларын кеңінен қамту көзделіп отыр.

Айта кетейік, 19-29 наурыз аралығында қазақстандық оқушылар 11 күн бойы көктемгі демалыста болады.