Елордалық жеткіншектер қаржылық сауаттылығын арттыруда

Астаналық оқушылар қаржылық сауаттылығын арттыруда.

Бүгін «Қаржы Скилл» қалалық қаржылық қауіпсіздік чемпионаты өз мәресіне жетті. «Заң мен тәртіп» және «Адал азамат» біртұтас тәрбие бағдарламасы аясында өткен бәсекеде 100-ге жуық мектептің оқушылары бақ сынасты. Байқау барысында білім алушылар алаяқтарды тану, дропперлік жүйенің алдын алу және қаржылық қауіптен қорғанудың, түрлі әдіс-тәсілдерін шығармашылық жолмен жеткізді. Сыни ойлау дағдыларына ден қойып, цифрлық кеңістікте жеке ақпараттардың қолды болу қаупін қойылым тақырыбына арқау етті. Нәтижесінде, қатысушылардың арасынан 6 мектеп финалдық кезеңге жолдама алды.

Әйгерім Пәрменова, ҚР Қаржылық мониторинг агенттігі Кадр әлеуетін дамыту басқармасының басшысы:

- Бүгінгі таңда цифрлық технологиялардың дамуына байланысты балалар алаяқтыққа ұшыраудың тәуекелдері жоғары. Чемпионаттың ерекшелігі - оқушылар қаржылық қауіпсіздік тақырыбын креативті әрі шығармашылық форматта меңгереді. Қазірше чемпионат пилоттық режимде тек Астана қаласында өткізілген. Жақында Қазақстанның басқа қалаларында да өткізуге жоспарлап отырмыз.