Эмпайр стейт билдинг төбесіндегі үйлену туралы ұсыныс ғашықтарға 20 жылға дейін бас бостандығынан айырылу қаупі төніп тұр

Әлемдегі ең танымал зәулім ғимараттар бірінің төбесінде үйлену туралы ұсыныс жасау, пацифистік баннер, қамауға алу және 20 жылға дейін темір торға тоғытылу қаупі. Руферлер Ангела Николау мен Иван Биркустың оқиғасы санаулы күндер ішінде әлемдік БАҚ-ты шарлап кетті. Tengri Life олардың кім екенін, қалай танымал болғанын және неге енді олардың тағдырын Манхэттен соты шешетінін баяндайды.

Қамауға алумен аяқталған ұсыныс

1 шілдеде әлемдегі ең танымал руферлер жұбының бірі Ангела Николау мен Иван Биркус Нью-Йорктегі аңызға айналған Эмпайр-стейт-билдинг ғимаратының ұшар басына шықты. 443 метр биіктікте олар мынадай жазуы бар баннер жайды:

"Махаббат құдіреті билікке деген құмарлықты жеңгенде, әлемде бейбітшілік орнайды"

Дәл сол жерде Иван Ангелаға тұрмысқа шығу туралы ұсыныс жасады. Ол келісімін берді. Кейін сақинамен суреттер Ангеланың Instagram парақшасында пайда болды.

Instagram-дағы бұл жарияланымды көру

A N G E L A N I K O L A U (@angela_nikolau) жарияланымы

Дегенмен, ұзақ тойлаудың сәті түспеді - бірнеше минуттан кейін жұпты Нью-Йорк полициясы ұстады.

Николаудың айтуынша, кейін құқық қорғау органдары неке сақинасын заттай айғақ ретінде тәркілеген.

Эмпайр-стейт-билдингте не болды?

Сот материалдарына сәйкес, таңғы сағат 11:15 шамасында Эмпайр-стейт-билдингтің күзет қызметі полицияға хабар тарату антеннасында қауіпсіздік режимі бұзылған болуы мүмкін екенін хабарлаған. Ол жерге кездейсоқ жету мүмкін емес.

Антеннаға жету үшін бірнеше техникалық қабаттан, соның ішінде 103-деңгейден өту керек, ал ол жерге 102-қабаттағы қорғалған есік арқылы электронды рұқсатпен ғана кіруге болады.

Полиция қызметкерлері оқиға орнына келгенде, 104-қабатқа апаратын есік құлпы бұзылғанын анықтады.

Тергеу мәліметінше, шығын көлемі шамамен екі мың доллар болған. Алайда бұл басты мәселе емес болып шықты. Эмпайр-стейт-билдинг антеннасы адам денсаулығына елеулі зиян келтіретін қуатты жоғары жиілікті радиосигналдар таратады.

Нью-Йорк полициясы арнайы бөлімшесінің қызметкерлері Ангела мен Иванға жақындамас бұрын, хабар тарату жабдығын толығымен өшіруге тура келді. Бұған жарты сағаттай уақыт кетті. Осыдан кейін ғана құтқарушылар жұпты алып шығу үшін шамамен 381 метр биіктікке көтерілді.

Полиция болжамы бойынша, Николау мен Биркус конструкциядан өз бетінше кете алмаса да, антеннаның жанында қала берген.

Тергеушілер пікірінше, олар осы әрекеттерімен өз өмірлеріне ғана емес, шұғыл қызмет қызметкерлерінің өміріне де қауіп төндірген.

Енді оларды не күтіп тұр?

Манхэттен прокуратурасы Ангела Николау мен Иван Биркусқа сегіз айып тақты.

Олардың ішінде D санатындағы үш қылмыстық құқықбұзушылық бар:

абайсызда өмірге қауіп төндіру (бірінші дәрежелі); мүлікті қасақана зақымдау (екінші дәрежелі); ұрлық мақсатында ғимаратқа басып кіру (үшінші дәрежелі).

Бұл баптардың әрқайсысы жеті жылға дейін бас бостандығынан айыру жазасын қарастырады.

Сонымен қатар жұпқа зәулім ғимараттың техникалық қабаттарына заңсыз кіру және ғимарат шатырына шығу ережелерін бұзу айыптары тағылып отыр.

Теориялық тұрғыдан алғанда, жалпы мерзім жиырма жылға дейін жетуі мүмкін, дегенмен АҚШ заңнамасы мерзімдер қосылмайтын неғұрлым жеңіл жаза нұсқаларына да жол береді.

2 шілдеде өткен алдын ала тыңдауда Ангела мен Иван кінәларын мойындамады. Олардың адвокаты Джейсон Крински тағылған айыптарды тым асыра сілтелген деп атады. Сот екеуін де кепілсіз, сот бақылауымен босатты. Келесі отырыс 24 тамызға жоспарланған.

Прокурорлардың айтуынша, Иванның өзі полицияға бұл акция "сөз салу құрметіне ерекше бірдеңе жасау тәсілі" ретінде жоспарланғанын түсіндірген.

Ангела Николау мен Иван Биркус кімдер?

Экстремалды руфинг әлемінде олардың есімдері баяғыда аңызға айналған.

33 жастағы Ангела Николау (шын тегі — Николаева) Мәскеуде цирк әртістерінің отбасында дүниеге келген. Бала кезінен балетпен және акробатикамен айналысқан. Кейін руфингке қызығып, зәулім ғимараттардың шатырынан түсірілген суреттерді жариялай бастады. Суреттерінің ерекше композициясы оны тез арада Instagram жұлдызына айналдырды.

Фото: angela_nikolau / Instagram

32 жастағы Иван Биркус (шын есімі — Иван Кузнецов) та Мәскеуде туған. Ол берген сұхбатында биіктік оған қарапайым өмірде сезіну мүмкін емес "сананың кеңею" сезімін сыйлайтынын айтқан болатын.

Олар 2014 жылы Қытайдағы бірлескен коммерциялық жоба кезінде танысқан. Иван Ангелаға Тяньцзиньдегі Goldin Finance 117 зәулім ғимаратына шығуды ұсынған. Осыдан кейін олар түсірілім бойынша серіктес қана емес, жұпқа айналды.

Фото: angela_nikolau / Instagram

Журналистер оларды руферлер деп атағанымен, Ангела мен Иванның өздері "skywalkers" деген атауды жөн көреді. Сөзбе-сөз аударғанда - "аспандағы жүргіншілер".

Олардың айтуынша, бұл экстремалды спорт емес, өнер. Мақсаттары - құр тәуекелге бару емес, басқа жолмен түсіру мүмкін емес бірегей кадрлар жасау.

Жұптың өзіндік стилін бірден тануға болады. Суреттерде Ангела зәулім ғимараттардың ұшында отырады, тұңғиықтың үстінде бір қолымен ілініп тұрады немесе бірнеше жүз метр биіктікте гимнастикалық элементтерді орындайды. Ал Иван бұл сәттерді экшн-камералар мен дрондардың көмегімен түсіреді. Дәл осы визуалды стиль оларды әлеуметтік желілердегі әлемдік жұлдыздарға айналдырды.

Олар қандай ғимараттарды бағындырды?

Кейінгі жылдары Ангела мен Иван әлемдегі ең танымал ондаған биік ғимараттың төбесіне шығып үлгерді.

Олардың ішінде:

Қытайдың Тяньцзинь қаласындағы Goldin Finance 117; Шанхайдың зәулім ғимараттары; Гонконг мұнаралары; Макаодағы биік ғимараттар; Париж мұнаралары; Москва-Сити; ММУ-дің бас ғимараты; Дубайдың зәулім ғимараттары.

Нью-Йорк оқиғасына дейінгі ең атышулы көтерілу - Малайзиядағы Merdeka 118 ғимаратын бағындыру болды.

2022 жылы жұп биіктігі 679 метрге жуықтайтын, әлемдегі ең биік екінші ғимарат - құрылысы жүріп жатқан нысанға жасырын кіріп, оның ең ұшына дейін жеткен.

Дәл осы сапар 2024 жылы жарыққа шыққан Netflix-тің "Skywalkers: A Love Story" деректі фильмінің негізі болды.

Instagram-дағы бұл жарияланымды көру

A N G E L A N I K O L A U (@angela_nikolau) жарияланымы

Фильм шыққаннан кейін Ангела мен Иванның аудиториясы бұрынғыдан да арта түсті.

Неге олар қайтадан назарға ілікті?

Эмпайр-стейт-билдингтегі оқиға бүкіл әлемнің назарын қайта аудартқан бірнеше жайттың басын біріктірді.

Бұл — әлемдегі ең танымал зәулім ғимараттар бірінің төбесінде жасалған романтикалық ұсыныс.

Бұл — пацифистік баннер.

Бұл — атышулы ұстау операциясы.

Сондай-ақ нақты қылмыстық жауапкершілікке тартылу қаупі.

Жанкүйерлері үшін олар әлі де биіктікті өнерге айналдырған адамдар болып қала береді.

Ал Америка билігі үшін олар - әрекеттері кесірінен күрделі құтқару операциясын жүргізуге және Нью-Йорк символдарының біріндегі хабар тарататын антеннаны уақытша өшіруге мәжбүр еткен заңбұзушылар.

Енді әлемдік руфингтегі ең танымал жұптар бірінің алдағы тағдыры кезекті ғимараттың шыңында емес, Манхэттен сотында шешіледі.

Google News арқылы жаңалықтарымызды қадағалаңыз

Жазылу