Енді ол жырау A$AP Rocky домбырамен байқалды

Қазақстандық режиссер Айсұлтан Сейітов Instagram парақшасында америкалық рэпер A$AP Rocky-дің домбыра ұстап түскен суретін жариялады. Сурет мыңдаған лайк жинап, қызу талқыға түсті: желі қолданушылары режиссерді құттықтап, рэпердің музыкалық эксперименттері туралы әзілдеп, оны қазақстандық фестивальдерге шақыруды ұсынып жатыр, деп хабарлайды Tengri Life.

Сейітов жарияланымға қоса берген жазбасында жобаның маңызы туралы айтып, музыкантқа көрсеткен сенімі үшін алғыс білдірді.

"Арманның шегі болмайды"

Режиссер Айсұлтан Сейітов үндеуінде бұл жұмыс ол үшін музыкалық клиптен әлдеқайда маңызды екенін атап өтті.

"Мұнда менің бір бөлшегім, өскен жерімнің және мәдениетіміздің ізі бар", - деп жазды Сейітов.

Ол домбырамен түскен суретті бәрі мүмкін екенін және арманның шегі болмайтынын еске салатын белгі деп атады.

"Бұл мен үшін бәрі мүмкін екенін, арманның шегі болмайтынын еске салатын сурет", - деді режиссер.

Ол Раким Майерске (A$AP Rocky ретінде танымал) осындай мүмкіндік беріп, сенім артқаны үшін алғыс айтты.

Сондай-ақ Сейітов оқырмандарына жылы қолдаулары үшін ризашылығын білдірді. Алайда ол домбыра музыканттың қолына қалай түскені туралы ашып айтпады.

Instagram-дағы бұл жарияланымды көру

Aisultan Seit (@aisultan) жариялаған жазба

Жазба астындағы пікірлерде желі қолданушылары режиссерді мақтан тұтатындарын және оның жұмысына тәнті болғандарын жеткізді.

"Біз сені мақтан тұтамыз!", "Айсұлтан нағыз аңыз ғой", "ASAP Жырау", "Келесі альбомында домбыраның сэмплын күтеміз", - деп жазды пікір қалдырушылар.

Айсұлтан Сейітов A$AP Rocky-ге клип түсірді

Айта кетейік, Айсұлтан Сейітов A$AP Rocky-дің "Shroom Clouds" әніне түсірілген клип авторларының бірі болған. Видеоның соңғы титрлерінде ол музыканттың өзімен және Пьетро Бис Биазиямен бірге режиссерлер қатарында көрсетілген.

Клип орындаушының YouTube-арнасында жарияланды. Онда жасыл төбе мен дала көрінісі қала көшелерімен, көне көліктермен және сюрреалистік визуалды эффектілермен алмасып отырады.

"Shroom Clouds" әні 16 қазанда шықты. Оның жазылуына америкалық орындаушылар Jeremih мен Reggie де қатысты. Бұл композиция "Don't Be Dumb" альбомының екінші бөлімі алдындағы алғашқы сингл болды.

Бұл Сейітов пен A$AP Rocky-дің алғашқы бірлескен жұмысы емес: 2021 жылы қазақстандық режиссер PacSun киім брендінің жарнамалық жобасын жасауға қатысқан болатын.

Жаңа клиптің түс коррекциясына қазақстандық колорист Ерлан Танай жауапты болды. Ол Лос-Анджелесте тұрады және Company 3 постпродакшн-студиясымен жұмыс істейді. Оның портфолиосында Әділхан Ержановтың "Сары мысық" фильмі, сондай-ақ T-Fest, Иван Дорн, Ғалымжан Молданазар, Скриптонит және "Масло Чёрного Тмина" музыканттарының жобалары бар.

Айсұлтан Сейітов несімен танымал?

Айсұлтан Сейітов 21 Savage және J. Cole сияқты шетелдік орындаушылардың музыкалық видеоларында жұмыс істеген. Қазақстанда ол 2022 жылы жарық көрген "Қаш" драмасының режиссері ретінде де танымал.

A$AP Rocky (шын есімі Раким Майерс) - "Грэмми" сыйлығына бірнеше рет ұсынылған америкалық рэпер. Музыкадан бөлек, ол ірі сән брендтерімен серіктес екені белгілі. 2020 жылдан бастап музыкант әлемдік поп-жұлдыз Рианнамен жұп құрған. Ерлі-зайыпты үш бала тәрбиелеп отыр.

Бізді Google-дың негізгі дереккөздер тізіміне қосыңыз

Қосу