Энергетика министрлігі жыл соңына дейін газ бағасы не болатынын айтты

Энергетика министрлігі 2026 жылдың аяғына дейін тауарлық газ бағасы өсімін болжап отырған жоқ. Бұл туралы үкіметте өткен брифингте энергетика вице-министрі Қайырхан Тұтқышбаев мәлімдеді, - деп хабарлайды Tengrinews.kz.

Журналистердің сұрағына жауап бере отырып, вице-министр 1 шілдеден бастап Қазақстанда тауарлық газдың орташа көтерме бағасын 33 пайызға көтеру туралы шешім күшіне енгенін еске салды.

Оның айтуынша, бағаның өсуі еліміздің газ инфрақұрылымын қолдау және жылыту маусымына дайындық қажеттілігімен байланысты.

"Біз үшін ең бастысы - елдің газ инфрақұрылымын сенімді қамтамасыз ету екенін түсінуіміз керек. Оны үнемі қолдап отыру қажет. Сонымен қатар "Қазақгаз" халық үшін тарифтерді субсидиялайды, сондықтан бұл мәселені біртіндеп шешу керек", - деді Тұтқышбаев.

Бұл ретте ведомство жақын арада бағаның қайта қаралуын күтпейді.

"Бүгінде біз жыл аяғына дейін бағаның жаңа өзгерісін болжап отырған жоқпыз. Бағаны одан әрі көтеру туралы қандай да бір шешімдер қабылдау немесе мәселені қарастыру әзірге жүргізіліп жатқан жоқ. 1 шілдеден бастап жаңа бағалар күшіне енді, қазіргі уақытта басқа өзгерістерді күтпейміз, - деді вице-министр.

Мамырда премьер-министрдің орынбасары - ұлттық экономика министрі Серік Жұманғарин Қазақстанда 1 шілдеден бастап тауарлық газдың көтерме бағасын 33 пайызға көтеру туралы шешім қабылданғанын хабарлаған болатын. Оның айтуынша, бұл газ саласына инвестиция тарту және инфрақұрылымды дамыту үшін қажет.

Кейінірек Энергетика министрлігі бағаның өсуі дәл осы тауарлық газдың көтерме бағасына қатысты екенін түсіндірді. Ведомство бұл шешімді газ инфрақұрылымын жаңғырту, жылыту маусымына дайындық және саланың ұзақ мерзімді тұрақтылығын қамтамасыз ету қажеттілігімен байланыстырды.