ЕО мен Орталық Азия жасыл энергияны бірге дамытады

Еуропалық Одақ Орталық Азияға көрсетілетін көмекті өзара келісіп үйлестіруге мүдделі.

Брюссельде өткен аймақ елдері өкілдерінің кездесуінде осы мәселе кеңінен талқыланды. «ЕроОдақ Орталық Азияның тұрақты дамуын қолдайды» жобасы Германияның Халықаралық ынтымақтастық жөніндегі қоғамының күшімен Қазақстан, Қырғызстан, Тәжікстан, Түрікменстан және Өзбекстанда жүзеге асырылып жатыр. Жоба Германияның Экономикалық ынтымақтастық және даму федералдық министрлігінің тапсырысы бойынша қолға алынған және Еуропалық Одақтың «Жаһандық қақпа» стратегиясы аясында бірлесіп қаржыландырылады. Басты мақсат – жаңартылатын энергия көздерін Орталық Азияның энергетикалық жүйелеріне тиімді интеграциялауға қолайлы жағдай жасау. Қазақстанда  өткен жылы жаңартылатын энергия көздерінің электр өндірісіндегі үлесі 6 пайыздан асты, ал 2025 жылдың қорытындысы бойынша бұл көрсеткіш тіпті ұлғаяды деген үміт бар. Биыл шамамен 500 МВт жаңа қуат өндірілмек. Оның ішіне жел және күн электр станциялары арқылы алынатын энергия да кіреді. Ұзақ мерзімді перспективада Қазақстан негізінен жел энергетикасына басымдық беруді жоспарлап отыр, өйткені біздің елде оның әлеуеті өте жоғары.

Свен Эрнедал, «Орталық Азиядағы ЖЭК»  бағдарламасының жетекшісі:

- Біз күн және жел энергетикасы жобаларын белсенді түрде ілгерілетіп келеміз. Бірақ ол үшін Орталық Азияның барлық елдері арасында тығыз үйлесім болуы қажет. Қазақстан мен Өзбекстанда жаңа электр станциялары салынып жатыр, ал желіні теңгерімдеу үшін Тәжікстан мен Қырғызстаннан гидроэнергия сатып алуға болады. Біздің мақсатымыз – бірлесе жұмыс істеуге үндеу, өйткені бұл міндетті бір ел жалғыз шеше алмайды.