Орталық Азиядағы жасыл құрылыстың болашағы қандай?

Астанада еліміздің Жасыл құрылыс кеңесі (KazGBC) ұйымдастырған Green Build Central Asia 2025 форумы өтіп, аймақтағы жасыл құрылыс индустриясының даму бағытын айқындаған маңызды оқиға болды, деп жазады Egemen.kz.

Биылғы форум Кеңестің он жылдық қызметіне арналды. Іс-шараға жетекші құрылыс компаниялары, девелоперлер, сәулетшілер, халықаралық ұйымдар, қаржы институттары мен жоғары оқу орындары өкілдері қатысты. Жүзден астам кәсіби маман жиналған алаң өңірдегі жасыл құрылыс саласының әлеуетін талқылайтын ірі платформаға айналды.

KazGBC он жылда тұрақты құрылыс мәдениетін дамытуда айтарлықтай нәтижеге қол жеткізді. Энергия тиімділігі, ресурстарды үнемдеу мен экологиялық талаптарды енгізу жөніндегі бастамалар саланың жаңа стандартын қалыптастыруға ықпал етті.

Отандық OMIR әдістемесі осы жұмыстың басты жемісінің бірі болып отыр. Қазір жалпы ауданы 5 млн шаршы метрге жуық 150-ден астам нысан OMIR сертификатын алған. Айта кетерлігі, әдістеме тек өзімізде ғана емес, өңір елдерінде де қолданылып, Әзербайжанның жасыл құрылыс стандартының негізі бола алды.

Жаңа технологиялар мен трендтер  

Форумда саланың өзекті бағыттары – инновациялық құрылыс материалдары, цифрландыру, жасыл жобаларды қаржыландыру механизмдері, жаңа буын мамандарын даярлау сияқты мәселелер талданды.

Спикерлер қатарында KazGBC өкілдері Данияр Азымханов, Айман Шопаева, Александр Белый, сондай-ақ Әзербайжан Жасыл құрылыс кеңесінің директоры Фуад Багиров пен құрылыс материалдарын сертификаттау жөніндегі сарапшы Виктория Глущенко болды. Іс-шараға Азия даму банкі, BI Group, Bazis A, Sat NS, Отбасы банк, Satbayev University және ЕҰУ сияқты ұйымдар қатысты.

 Игі іс-шараның маңызды сәттерінің бірі жасыл құрылыс саласындағы үздік жобалар мен компанияларды марапаттайтын Green Awards рәсімі болды. Марапат иегерлері қатарында Sat NS, OKS Group, Kanfar Building, АДБ, Нұр Астана құрылыс, Nest Stroy, Satbayev University, «Эргономика» ғылыми-өндірістік фирмасы және басқа ұйымдар бар.

KazGBC директоры Данияр Азымханов он жылдағы қиындықтар мен жетістіктерге тоқталып, «тұрақты әрі дамушы жүйе қалыптастыру – бүкіл команданың еңбегі» екенін айтты. Ал атқарушы директор Александр Белый «Қазақстан нарығы экологиялық трансформацияға дайын, жасыл құрылыс экономикалық өсімге де, бәсекеге қабілеттілікке де әсер ететін факторға айналды» деді.

Әзербайжан Жасыл құрылыс кеңесінің директоры Фуад Багиров Орталық Азия – Каспий – Кавказ аймағындағы серіктестік жасыл құрылыс бойынша бірлескен жобалар әзірлеуге мүмкіндік беретінін атап өтті. Оның айтуынша, KazGBC өңірдің жасыл құрылыс трендтерін қалыптастырып, көрші елдер үшін тәжірибе орталығына айналып отыр.

Қазақстан – өңірлік жасыл құрылыс орталығы

Green Build Central Asia 2025 форумы тәжірибе алмасудың, кәсіби байланыс пен бірлескен жобаларды бастауға арналған алаңның маңызын көрсетті. Практикалық шешімдердің таныстырылуы, OMIR әдістемесін жетілдіру бағыттарының белгіленуі мен үздік компанияларды марапаттау еліміздің жасыл құрылыс бойынша өңірлік көшбасшы ретінде орныға түскенін дәлелдейді.

KazGBC форумның қорытындысында «Он жылда тұрақты құрылыс идеяларын нарық дамуының бір бөлігіне айналдырдық. Бүгінде еліміз Орталық Азиядағы жасыл құрылыс көшбасшысы болуға толық мүмкіндігі бар», деген тұжырым айтылды.

Бұл форум тұрақты инфрақұрылым құруға бағытталған жаңа жобаларға жол ашып, елдің жасыл экономикаға көшуіндегі маңызды қадамдардың бірі болды.