ERG жасыл металлургияны дамытпақ

Қара металлугия саласында алпауыт саналатын АҚШ-тың «Ми́дрекс Текноло́джис», Аустрияның «Пра́йметалс Те́хнолоджис» және Қазақстанның ERG компаниялары стратегиялық келісімшарт жасасты.

Құжатқа сәйкес Қостанай облысының Рудный қаласында ыстық брикеттелген темір өндіретін зауыт пайда болады. Жаңа өндіріс орыны -экологиялық таза технологияға, жасыл экономикаға негізделеді.

ERG-дің жаңа өндіріс орыны - ыстық брикеттелген темір өндіретін зауыт болашақта Орта Азиядағы ірі металлургиялық нысандарының біріне айналмақ. Нәтижесінде Қазақстан жаһандық болат құю нарығына шығып, бәсекеге қабілетті өнімнің жаңа түрін ұсына алады.

Шухрат Ибрагимов, ERG директорлар кеңесінің төрағасы, бас атқарушы директоры:

- Бұл Президенттің айқындап берген стратегиялық міндеттерін жүзеге асыру барысындағы маңызды қадам. Осы жобаның арқасында өндіріс кеңейіп, жаңа жұмыс орындары ашылады. Ең бастысы алғашқы рет қара металлургия саласында экологиялық кластер құрылады.

Жаңа зауытта қатты отын кокстың орынына табиғи газ пайдаланылады. Домна пешін темірді тікелей қалпына келтіретін озық технология алмастырады. Мұнда металдығы 93 пайыз, темір үлесі 90 пайыздан жоғары өнім алу көзделіп отыр.

Андреас Фибек, Primetals Technologies компаниясының вице-президенті:

- Бұл Қазақстанның металлургия саласындағы жаңа дәуірдің бастауы болатын ауқымды жоба. Кеннен темір өндірудің таза технологиясы. көміртегі ізін 50 пайызға төмендетуге мүмкіндік береді.

«Осы зауыт іске қосылғанда Қостанай облысы қара металлургия орталығына айналады деген сенім бар», - дейді өңір басшысы Құмар Ақсақалов.

Құмар Ақсақалов, облыс әкімі:

- Бұл жоба жеке өңірге ғана емес, еліміз үшін үлкен маңызға ие. Ең басты деген 17 жобаның қатарына кіреді. Сондықтан барлық көмек-қолдау көрсетеміз.

Сонымен ыстық брикеттелген темір өндіру зауытын салу туралы үш жақты келісімшартқа АҚШ, Аустрия және Қазақстан компанияларының өкілдері қол қойды. Жоба құны 655 млрд теңге. Өндірісті 2029 жылы іске қосу жоспарланып отыр.

Авторлары: Мағауия Қалиев, Сергей Трахтенберг