Ерлан Қарин: Тойдағы даулы уағыз ұлттық құндылықтарға сай келмейді

«Тойда тілекке шығып, ерсі уағыз айтып кеткен ер адамның видеосын желіден көріп қалдым. Шын мәнінде, оның әйелдерді кемсітуі, әншілерге, музыка өнеріне қатысты теріс пікір білдіруі болмысымызға мүлдем жат. Ұлттық таным-түсінікке сәйкес келмейді. Өйткені, Қазақстан – зайырлы мемлекет. Біздің темірқазығымыз – Конституция. Бірінші орында діни шектеулер емес, еліміздің заңдары тұрады.
Сол секілді, өнер мен мәдениетті дінге қарсы қою да – асыра сілтеушілік. Мемлекетіміз таңдаған жол бұл емес. Керісінше, еліміз білім мен ғылымға, өнер мен мәдениетке басымдық беріп келеді.
Көпшілік алдында адамдарды бұлайша алалау, өз пікірін қасақана тықпалау әдептілікке жатпайды. Біз өзара құрмет пен мәдениетті биік қоямыз. Еліміздің жаңа қоғамдық этиканы қалыптастыруға ерекше мән беріп отырғаны да сондықтан.
Сол себепті, ұлттық болмыс пен елдік ұстанымдарға қайшы келетін мұндай әрекеттерге қоғам болып тосқауыл қоюымыз қажет», деп жазды Ерлан Қарин Facebook-тегі өз парақшасында.

«Музыка – харам»: Тойда уағыз айтқан ер адам көптің талқысына түсті

Тойда айтылған уағыздың видеосы әлеуметтік желілерде кеңінен тарап, қоғамда резонанс туғызды. Желі қолданушылары әйелдерге, өнер мен мәдениетке қатысты айтылған пікірлерді қызу талқылап, оған байланысты түрлі көзқарас білдіруде.