Еуразия даму банкі ЕАЭО елдерінің экономикасы тұрақты өсіп жатқанын мәлімдеді

АСТАНА, 24 желтоқсан – Sputnik. Еуразия даму банкі (ЕАДБ) 2025 жылдың қаңтар-қараша айларында Қазақстан экономикасының 6,4% деңгейінде өскенін хабарлады.

Апталық макроэкономикалық шолуда банк экономиканы әртараптандыруға бағытталған шаралардың арқасында өңдеу өнеркәсібі (5,9%), көлік секторы (20,3%) және құрылыс саласы (14,7%) жоғары өсім көрсеткенін атап өтті.

"Қосымша фактор ретінде Теңіз кен орнында жаңа қуаттардың іске қосылуы әсер етті: мұнай өндіру жылдық есеппен 14,1%-ға өсті – 2025 жылға арналған мұнай экспорты жоспары қазірдің өзінде орындалды", – деп хабарлады банк сарапшылары.

Үкіметтің қолдау шараларының нәтижесінде ауыл шаруашылығы да 6,1% өсті

"2026 жылы 5,5% деңгейінде тұрақты өсім болады деп болжап отырмыз", – дейді сарапшылар.

ЕАЭО елдеріндегі инфляцияға келсек, мысалы, Ресейде қыркүйек-қараша айларында тұрақты орташа айлық инфляция жылдық мәнде 4,4%-ды құрады. Сонымен қатар инфляциялық тәуекелдер сақталған. Қосылған құн салығы мөлшерлемесін арттыру қарсаңында халық арасында инфляцияның өсуіне қатысты бағалау желтоқсан айында 13,7%-ға жетті, бұл қарашадағы көрсеткіштен жоғары (13,1%).

"Инфляцияны тұрақты түрде баяулату үшін қатаң ақша-несие саясатын реттеуші орган әрі қарай да сақтайды деп есептейміз. Сондықтан негізгі мөлшерлеме 2026 жылдың екінші тоқсанына дейін 16% деңгейінде қалады деп болжап отырмыз", – деп атап өтті ЕАДБ.

Еуразиялық экономикалық одақтың басқа елдері бойынша да экономикалық деректер келтірілді. Мысалы, Қырғызстанда 2025 жылдың қаңтар-қараша айларында ЖІӨ 10,2%-ға өсті.

Инвестициялық және тұтынушылық сұраныстың жоғары деңгейі экономикалық өсімнің негізгі тірегі болып қала береді. Негізгі капиталға салынған инвестициялар 18,1%-ға, ал бөлшек сауда 9,5%-ға артты.

"Инвестициялық белсенділік келесі жылы да экономиканың басты қозғаушы күші болады. Сондықтан 2026 жылы ЖІӨ өсімі 9,3% деңгейінде болады деп болжап отырмыз", – деп жазды сарапшылар.

Беларусьте 2025 жылдың қаңтар-қараша айларында ЖІӨ 1,3%-ға өсті. ЕАДБ мәліметінше экономика тұтынушылық және инвестициялық белсенділік есебінен өсімін сақтап отыр. Бөлшек тауар айналымы 7,1%-ға, негізгі капиталға салынған инвестициялар 11,8%-ға артты. Сарапшылар 2026 жылы үкімет жоспарлаған 600 жобаның іске асуына және Ресей экономикасы өсімінің жеделдеуіне байланысты Беларусь ЖІӨ-і 1,8%-ға өседі болжайды.