Еуроодақ Украинаға ресейлік активтерден түскен пайда есебінен қосымша қаражат бөлді

АСТАНА, 1 сәуір – Sputnik. Еуроодақ Украинаға бұғатталған ресейлік активтерден түскен пайдадан қосымша 80 миллион еуро бөлді, деп хабарлады Киевтегі баспасөз мәслихатында еуродипломатия басшысы Кая Каллас.

"Бүгін біз Украинаға бұғатталған ресейлік активтердің пайдасы есебінен қосымша 80 миллион еуро беріп жатқанымызға қуаныштымын", - деді ол.

Каллас сонымен қатар Ресейге қарсы санкцияларды жеңілдетудің орнына қатаңдатуға шақырды.

Ресейдің Украинадағы арнайы операциясы басталғаннан кейін Еуроодақ және G7 елдері Ресейдің алтын-валюта резервтерінің жартысына жуығын бұғаттады. Бұл шамамен 300 миллиард еуроны құрайды. Оның 200 миллиард еуродан астамы Еуроодақта, оның ішінде әлемдегі ең ірі клиринг және есеп айырысу жүйелерінің бірі болып табылатын Бельгияда орналасқан Euroclear шоттарында 180 миллиард еуро бар.

Еуропалық комиссия 2025 жылдың қаңтарынан қарашасына дейін Еуроодақ Украинаға Ресейдің бұғатталған активтерінен түскен қаражаттан 18,1 миллиард еуро аударғанын хабарлады.