Фельдшер Ұлдана Мырзуанның өлімі: іс сотқа берілді

Астанада қасбеттің құлауы салдарынан фельдшер Ұлдана Мырзуанның қаза болуына қатысты қылмыстық іс сотқа түсті, - деп хабарлайды Tengrinews.kz тілшісі.

Ішкі істер министрлігінің Tengrinews.kz ресми сауалына берген жауабында Астана Полиция департаменті сотқа дейінгі тергеп-тексеруді аяқтағанын хабарлады. Іс Қылмыстық кодекстің 254-бабы 1-бөлігі "Міндеттеріне адал қарамау" бойынша жүргізілген.

6 тамызда қылмыстық іс материалдары сотқа жолданды.

Елордалық соттың баспасөз қызметі іс материалдарының түскенін, бірақ алдын ала тыңдалым күні әлі белгіленбегенін айтты.

Еске салайық, 2025 жылғы 8 қарашада Астанадағы Тәуелсіздік даңғылы, 24 Б мекенжайында орналасқан тоғыз қабатты үйдің қасбетінен кірпіш қаптама құлаған. Салдарынан бес адам зардап шекті. Олар №1 көпбейінді ауруханаға жатқызылды.

Бір пациенттің жағдайы өте ауыр болып, оған ота жасалды. Тағы екеуі жансақтау бөлімінде жатты, дәрігерлер олардың жағдайын ауыр деп бағалады. Қалған екеуі бөлімшеге ауыстырылды, олардың жағдайы тұрақты деп бағаланды.

Ең ауыр жарақат алған пациент - оқиға орнына жеткен жедел жәрдем фельдшері, 23 жастағы Ұлдана Мырзуан болып шықты. Қыздың туыстарының айтуынша, ол зардап шеккендерге алғашқы болып көмекке ұмтылған. Ол жерде бала, оның анасы және олардың туысы болған. Ұлдана зардап шеккендерге қарай жүгірген кезде, "үстіне кірпіштер мен кондиционердің бекіткіш құрылғысы құлаған". 18 қарашада ол ауруханада қайтыс болды.

Оқиғадан кейін полиция Қылмыстық кодекстің 278-бабы "Сапасыз құрылыс" бойынша қылмыстық іс қозғады. Кейінірек істе тағы бір бап пайда болды – 306-бап "Қауіпсіздік талаптарына сай келмейтін тауарларды шығару немесе сату, жұмыстарды орындау не қызметтерді көрсету".

Президент Қасым-Жомарт Тоқаев Ұлдана Мырзуанды ерлігі, жанқиярлығы және міндетін үлгілі атқарғаны үшін "Ерлігі үшін" медалімен марапаттады. Қазақстандықтар жедел жәрдем фельдшерімен қалай қоштасқаны туралы біздің материалда.

Фото: ©️ Tengrinews.kz / Айсұлтан Құлшманов

Бұған дейін ІІМ тергеу амалдары жалғасып жатқанын және ведомство тағайындалған сараптама қорытындыларын күтіп отырғанын мәлімдеген болатын.

Google News арқылы жаңалықтарымызды қадағалаңыз