​FlyArystan таразысы 7,1 кг орнына 12 кг көрсеткен: жолаушы қол жүгін тексеруге қатысты шағымданды

Астана әуежайында FlyArystan рейсіне отырғызу алдында қол жүгін қайта өлшеу оқиғасы әлеуметтік желіде қызу талқыланды.

Threads желісінде jakentus атты қолданушы өзінің тәжірибесін жазды. Оның айтуынша, тіркеу кезінде қол жүгін «қызық үшін» өлшегенде таразы 7,1 кг көрсеткен. 

Алайда транзиттік аймақтан өткен соң, ұшаққа отырғызу алдында FlyArystan қызметкерлері қайта өлшегенде салмақ 12 кг болып шыққан. Осыдан кейін жолаушыға 11 мың теңге төлеу қажеттігі айтылған.

Жолаушы басқа таразыда қайта өлшеуді сұраған. Нәтижесінде басқа таразы тағы да 7,1 кг көрсеткен.

Пікірлерде қолданушылар ұқсас жағдайларын бөлісіп, мұндай сәттерді бейнежазбаға түсіруге және таразының тексеру сертификатын талап етуге кеңес берген.

Кейін FlyArystan жарияланымға жауап беріп, гейттегі таразының жарамды сертификаты бар екенін хабарлады. Дегенмен жабдық техникалық тексеріске жіберіліп, уақытша пайдаланудан шығарылған.

Бүгін, 19:06