​Фотосессияға арналған жеміс жидек: Шымкентте тәрбиешілер балаларға қатыгез әрекет жасады

Видеодан алынған кадр

Шымкентте «Балымша» балабақшасына қатысты үлкен дау шықты. Желіде тәрбиешілердің бүлдіршіндерге фотоға түсіру үшін банан таратып беріп, суретке түсіріп болғаннан кейін жемістерді жылаған балалардың қолынан жұлып алып, қайта жинап жатқан видеосы пайда болды, деп хабарлайды инстаграм пайдаланушысы abdulla_kzkz.

Бұл көрініс қазақстандықтардың арасында үлкен наразылық тудырды. Оқиғаға Шымкент қалалық Білім басқармасы шұғыл түрде реакция білдірді. Ведомство мектепке дейінгі мекемеде шұғыл тексеріс жүргізді.

Тексеру қорытындысы бойынша балабақша меңгерушісі мен оқиғаға қатысы бар қызметкерлер түсініктеме жазды. Жазалау шаралары да кезек күттірген жоқ.

«Тексеру нәтижесі бойынша оқиғаға қатысы бар бес тәрбиешінің үшеуі теріс уәждермен (мотивтермен) жұмыстан шығарылды. Балабақша басшылығына қатысты да тиісті шаралар қабылданатын болады», — деп хабарлады бейінді ведомстводан.

Іске полиция араласты

Мәселе тек жұмыстан шығарумен ғана шектелген жоқ. Білім басқармасы жинаған материалдар құқық қорғау органдарына ресми түрде жолданды.

Полициядан бөлек бұл оқиғамен мына ведомстволар да айналысады:

Білім беру саласындағы сапаны қамтамасыз ету департаменті;Санитариялық-эпидемиологиялық бақылау департаменті (СЭБД).

Мемлекеттік органдар тергеу барысын ерекше бақылауда ұстауға уәде берді.

Бүгін, 10:38