Францияда жаппай тәртіпсіздіктерге байланысты жүздеген мектеп жабылды: 5 мыңнан астам адам ұсталды

фото: Reuters

Францияда жалғасып жатқан наразылықтар мен жаппай тәртіпсіздіктерге байланысты бүкіл ел бойынша жүздеген білім беру мекемесі жабылып жатыр. Акциялар басталғалы полиция 5 мыңнан астам адамды ұстады, олардың басым көпшілігі — кәмелетке толмағандар, деп жазады Би-би-си.

Бұл туралы елдің білім министрі Эдуар Жеффре мәлімдеді. Оның айтуынша, дүйсенбі күні 400-500 орта мектепте сабақтар толық немесе ішінара тоқтатылады. Себебі билік оқушылар мен педагогтердің қауіпсіздігіне кепілдік бере алмай отыр.

Тәртіпсіздіктер басталғалы кемінде 24 мектеп өртеліп немесе тоналды, ал бүліктер келтірген залал әртүрлі деңгейде 700-ден астам білім беру мекемесіне әсер етті.

«Белсенділер бар — атап айтқанда, солшылдар лагерінен шыққандар — олар жоғары сынып оқушыларының қозғалысына еніп, оны өз бақылауына алды және шектен тыс зорлық-зомбылыққа барып отыр. Әлбетте, бұл біздің қызметкерлерімізге де, оқушылардың өздеріне де қауіп төндіреді», — деді Францияның білім министрі.

Ол білім беру жүйесінің 78 қызметкері жарақат алғанын айтып, болып жатқан жағдайды «бұған дейін-соңды болмаған зорлық-зомбылық деңгейі» деп атады.

Наразылықтар не себепті басталды?

Наразылық толқыны 17 қыркүйекте Париждегі мектептердің бірінде басталған, алайда көп ұзамай бүкіл ел бойынша шерулерге ұласты. Оқушылар мен педагогтер:

мұғалімдердің өткір тапшылығына;

сыныптардың шамадан тыс толуына;

мектеп ғимараттары мен инфрақұрылымының тозуына қарсы наразылық білдіруде.

Алайда бейбіт акциялар көп ұзамай полициямен қақтығысқа ұласты. Құқық қорғау органдары резеңке таяқ пен көзден жас ағызатын газ қолдануда.

Мұғалімдерге жасалған шабуылдар және қатаң ұстаулар

Бірқатар өңірлердегі жағдай шегіне жетті. Le Monde басылымының мәліметінше, Францияның оңтүстігінде 16 жастағы жасөспірім ұсталды: наразылық кезінде бір топ жас 59 жастағы мұғалімді соққыға жығып, үстіне бензин құйған.

Бельфорда жерде жатқан полицейді жасөспірімдердің аяқпен тепкілеп жатқаны түсірілген видео қоғамда үлкен резонанс тудырды. Осы іске байланысты 15 және 17 жастағы Болгарияның екі азаматы ұсталды.

Франция Ішкі істер министрлігінің мәліметінше, тек бір жұма күні құқық қорғау органдары 1747 адамды қамауға алған. Наразылықтар басталғалы барлығы 5 мыңнан астам қатысушы ұсталды, олардың шамамен 85%-ы — кәмелетке толмағандар.

Билік пен құқық қорғаушылар қалай әрекет етуде?

Франция премьер-министрі Себастьен Лекорню үкімет шұғыл шаралар әзірлеп жатқанын мәлімдеді. Билік инфрақұрылым мәселелерін реттеп, сабақ кестесін қайта қарауы және вандалдарды келтірілген шығынды өз қалтасынан толық өтеуге міндеттейтін заңның қабылдануын жеделдетуі тиіс.

Сонымен бірге Amnesty International құқық қорғаушылары полицияның әрекетін қатаң айыптап, құқық қорғау органдарын «күшті шамадан тыс қолданды» және жасөспірімдерді негізсіз ұстады деп айыптады. Ішкі істер министрлігі бұл айыптауларды жоққа шығарып, полиция тек білім алғысы келетін немесе бейбіт түрде наразылық білдіргісі келетін оқушыларды қорғап жатқанын мәлімдеді.

Наразылықты ұйымдастырушылар билік әзірге нақты шешімдер ұсынбағанын айтып, жаңа акцияларға шығуға шақырды.

Бүгін, 15:57