Франкфуртта Абай үні қалықтады

Франкфурт қаласында орналасқан Қазақстан Республикасының Бас консулдығы ғимаратында қазақ руханияты мен мемлекеттілігіне арналған тағылымды рухани кеш өтті, деп хабарлайды Egemen.kz. 

«Ұлы сөздің ұлағаты» деп аталған бұл шара ұлы ойшыл, кемеңгер ақын Абай Құнанбайұлының 180 жылдығы және Қазақстан Республикасының Мемлекеттік егемендігі туралы Декларациясының қабылданғанына 35 жыл толуына орай ұйымдастырылды.

Кештің басты мақсаты – қазақ әдебиетінің байлығын, ұлт руханиятының тереңдігін дәріптеу және Тәуелсіз Қазақстанның рухани іргетасын қалаудағы Абай мұрасының маңызын жаңа қырынан таныту болды. 

Іс-шараның ашылу салтанатында Қазақстан Республикасының Бас консулы Тауболды Балхияұлы Үмбетбаев сөз сөйлеп, Абай даналығы мен ел тәуелсіздігінің рухани сабақтастығын ерекше атап өтті. Оның айтуынша, Абайдың сөзі мен ойы қазақ халқының рухани әлемін тереңдетіп қана қоймай, елдің егемен болмысын нығайтқан іргетасқа айналды.

Сонымен қатар ҚР Мәдениет және ақпарат министрлігі Архив, құжаттама және кітап ісі комитетінің басшысы Алмаз Әмірбекұлы Мырзахметов және ҚР Ұлттық мемлекеттік кітап палатасының директоры Әділ Қойтанов өз лебіздерін білдіріп, қазақ әдебиетінің халықаралық кеңістікке шығуының маңыздылығына тоқталды.  

Кеш аясында «Жазу мен жариялау: Қазақ әдебиетінің жаңа кеңістіктері» атты арнайы тақырыптық бөлім өтті. Бұл бөлімде белгілі ғалым, академик, қоғам қайраткері Оразалы Сәбден сөз сөйлеп, Абай мұрасының қазіргі қазақ қоғамындағы орны мен ұлттық сананы қалыптастырудағы ықпалын терең талдады. Шара барысында еліміздің жетекші баспалары – «Алматыкітап», «Атамұра», «Мектеп», «Arman-PV baspasy», «Эверо» баспалары өздерінің жаңа басылымдарын таныстырып, заманауи әдеби үрдістер мен кітап ісіндегі жаңашыл бағыттар жөнінде ой бөлісті.

Абайдың «Қара сөздері» жеті тілде

Кештің ең әсерлі сәттерінің бірі – Абайдың «Қара сөздерінің» жеті тілде жарық көруі туралы жобаның таныстырылымы болды. Бұл еңбекті көпшілікке қазақ тілі оқытушысы, аталған кітапты құрастырушы Гүлмира Әбілмәжінқызы Амандықова таныстырды. Оның айтуынша, бұл жоба Абайдың даналық мұрасын әлемдік деңгейде насихаттауға және қазақ руханиятын халықаралық қауымдастыққа таныстыруға бағытталған.
Кеш соңында Франкфурттағы халықаралық кітап көрмесіне арнайы қастысқан қазақстандық делегация мүшелері мен баспа өкілдері өздерінің таңдаулы еңбектерін Қазақстан Республикасының Бас консулдығы кітапханасына тарту етті. Бұл бастама қазақ әдебиетінің шетелде таралуына серпін беріп, ұлттық руханияттың халықаралық кеңістікте кеңінен танылуына жол ашады.  Сонымен бірге олар әдебиет пен баспа ісінің өзекті бағыттары жөнінде пікір алмасып, болашақтағы шығармашылық ынтымақтастыққа ниет білдірді.

Майн өзені жағасында өткен «Ұлы сөздің ұлағаты» рухани кеш – ұлы Абайдың рухани мұрасын жаңғыртып, Тәуелсіз Қазақстанның мәдени болмысын айшықтаған тағылымды шара болды. Бұл әдеби басқосу қазақ сөз өнерінің биік құндылығын дәріптеп, ұлттық әдебиеттің әлемдік мәдениетпен үндескен жаңа кезеңін айқын көрсетті.