Ғалымдар 50 миллион жыл бұрын өмір сүрген қолтырауынның жаңа түрін тапты

Ғалымдар Мысырдан шамамен 50 миллион жыл бұрын өмір сүрген қолтырауынның бұрын белгісіз болған түрін анықтады, – деп хабарлайды Aikyn.kz сайты.

Зерттеу нәтижесі 6 қазанда Royal Society Open Science журналында жарияланды.

Қазба қалдығы Каирдің оңтүстік-шығысындағы Мокаттам жотасынан табылған. Бір қызығы, дәл осы геологиялық қабаттағы тастар кезінде Гиза сфинксін салуға пайдаланылған.

Бұған дейін ғалымдар бұл жануарды қазіргі Малайзия мен Индонезияда кездесетін жалған гавиалдардың туысы деп есептеген. Бірақ зерттеушілер компьютерлік томография көмегімен бас сүйектің 300-ден астам белгісін салыстырып, оның жеке түр екенін анықтады.

Жаңа түрге Herugavialis cairensis деген атау берілді. Оның тұмсығы ұзын болған және негізінен балықпен қоректенген деп болжанып отыр.

Зерттеушілердің айтуынша, жаңалық қолтырауындардың эволюциялық тарихын тереңірек түсінуге мүмкіндік береді.