Ғалымдар мал шаруашылығындағы шығындарды азайту үшін жаңа буын құрама жемдерін әзірлеуде

Қазіргі заманғы мал шаруашылығы толыққанды, экономикалық тұрғыдан қолжетімді және биологиялық құнды азықпен қамтамасыз етілуге тікелей байланысты. Бұл ретте дәстүрлі компоненттердің, әсіресе ақуыз текті қоспалардың қымбаттауы өнімнің өзіндік құнын арттырып, оның бәсекеге қабілеттілігін төмендетеді, – деп хабарлайды Aikyn.kz.

Осы мәселені шешу мақсатында отандық ғалымдар қымбат ақуыздық компоненттердің орнын алмастыру арқылы мал шаруашылығы өнімдерінің өзіндік құнын төмендетуге мүмкіндік беретін құрама жем технологиясын әзірлеуде. Оны Қазақ ұлттық аграрлық зерттеу университетінің тамақ және қайта өңдеу өнеркәсібі саласындағы ғалымдар жүзеге асыруда.

Әзірленіп жатқан технология физика-химиялық сипаттамалары әртүрлі шикізатты өңдеу ерекшеліктерін ескереді және ұсақтау, араластыру процестерін оңтайландыруға бағытталған. Бұл құрама жемнің біртектілігі мен қауіпсіздігін қамтамасыз етуге мүмкіндік береді.

Сонымен бірге жем құрамына қосымша ірі қара малдың микрофлорасын тұрақтандыруға, қоректік заттардың қорытылуын арттыруға, зат алмасу процестерін жақсартуға және асқазан-ішек жолдары ауруларының қаупін азайтуға ықпал ететін пробиотикалық қоспалар енгізіледі.

Мультиақуыздық шикізатты пробиотиктермен бірге қолдану малдың өнімділігін арттыруға, азық конверсиясын жақсартуға және қоректік заттардың жоғалуын азайтуға бағытталған. Жобаны іске асыру құрама жемнің өзіндік құнын төмендетуге, қайталама ресурстарды ұтымды пайдалануға және қайта өңдеу кәсіпорындарына түсетін экологиялық жүктемені азайтуға ықпал етеді.

Жобаның негізгі мақсаты – ауыл шаруашылығы жануарларына арналған табиғи мультиақуыздық шикізат қосылған, пробиотигі бар, құнарлылығы жоғары және жеңіл қорытылатын құрама жем өндіру технологиясын әзірлеу.

Сараптама, зерттеу мақала, күнделікті өзекті ақпаратты «Айқынның»   TELEGRAM арнасынан табасыз.