Ғалымдар смартфондағы түнгі режимнің көзге қандай зияны барын айтты

Көптеген адам смартфонды қараңғы режимге ауыстырып қолданғанды жөн көреді. Алайда офтальмологтар мұның көздің шаршауын толықтай шешпейтінін айтады, – деп хабарлайды Aikyn.kz Аlmaty.tv арнасына сілтеме жасап.

Офтальмологиялық орталық дәрігері Хадижат Сулейманованың айтуынша, қараңғы фон тек жарығы аз ортада, жарыққа сезімтал болғанда немесе бас ауырып тұрған кезде ыңғайлы. Сондай-ақ құрғақ көз синдромында да жайлылық береді. Бірақ оның да өз шектеуі бар: ақ әріптердің қара фонда көрінуі көз қарашығын үлкейтіп, мәтінді оқуды қиындатады. Әсіресе, астигматизмі бар немесе жасы ұлғайған адамдар үшін әріптер айналасында «сәуле» пайда болып, жазуды қабылдау қиындайды. Сондықтан ұсақ мәтінді оқу үшін ашық фон қолайлырақ.

Маман смартфонды қолданғанда әр 20 минут сайын көзді демалтып, алыстан 20 секунд қарауға және құрылғыны көзден 30-40 см қашықтықта ұстауға кеңес береді.

Дәрігер шашқа арналған лак, күннің күюіне қарсы спрей және спиртті антисептиктер линзаға тиген жағдайда көруді нашарлатып, көзді зақымдауы мүмкін екенін ескертті. Мұндай заттардың жиі әсері қасаң қабық эрозиясына және «аэрозольдік кератопатияға» әкелуі ықтимал.

Дәрігерлер линза қолданушыларға қауіпсіздік үшін біркүндік линзаларды таңдауға, ал аэрозольдерді линза кимей тұрып пайдалануға кеңес береді.